കറാച്ചി: പാകിസ്ഥാനിലെ സൌത്ത് സിന്ധിലാണ് അപകടം നടന്നത്. ആളില്ലാ ലെവല് ക്രോസ്സിലൂടെ റെയില്വേ ട്രാക്കില് കയറിയ ബസ്സിനെ അതിവേഗ ട്രെയിന് ഇടിച്ചു തെറിപ്പിക്കുകയായിരുന്നു. സംഭവത്തില് ബസ്സിലുണ്ടായിരുന്ന 20 പേര് മരണപ്പെട്ടു. സൌത്ത് സിന്ധ് പ്രവിശ്യയിലെ രൊഹ്രി റെയില്വേ സ്റ്റേഷന് അടുത്ത് കന്ധാര റെയില്വെ ക്രോസ്സിലാണ് സംഭവം.
സുകുരില് നിന്ന് പഞ്ചാബ് പ്രവിശ്യയിലേക്ക് പോവുകയായിരുന്ന ബസ്സില് 50-ലേറെ പേരുണ്ടായിരുന്നതായാണ് വിവരം. അപകടത്തില് പെട്ട ബസ്സിലുണ്ടായിരുന്നവരില് പലരേയും അതീവ ഗുരുതരാവസ്ഥയില് ആശുപത്രികളില് പ്രവേശിപ്പിച്ചിരിക്കുകയാണ്. അപകടത്തിന്റെ ആഘാതം വളരെ വലുതാണെന്നും മരണസംഖ്യ ഇനിയും ഉയരുമെന്നും പ്രവിശ്യയിലെ പോലീസ് കമ്മീഷണര് ഷഫീഖ് അഹമദ് മഹ്ശേറെ ഉദ്ദരിച്ച് വാര്ത്താ ഏജന്സികള് റിപ്പോര്ട്ട് ചെയ്തു. അപകടത്തില് ബസ് പൂര്ണ്ണമായും തകര്ന്നു. ബസ് ഡ്രൈവറുടെ അശ്രദ്ധയാണ് അപകടത്തിനു കാരണമെന്നാണ് പ്രാഥമിക നിഗമനം. അപകടത്തെ കുറിച്ച് വിശദമായ അന്വേഷണത്തിന് സര്ക്കാര് ഉത്തരവിട്ടു
റാവല്പിണ്ടിയില് നിന്ന് കറാച്ചിയിലേക്ക് പോകുകയായിരുന്ന '45 അപ് - പാക് എക്സ്പ്രസ്സ് ' എന്ന അതിവേഗ ട്രെയിനാണ് ബസ്സില് ഇടിച്ചത്. . അപകടത്തിന്റെ ആഘാതത്തില് ട്രെയിന് എഞ്ചിന് തകര്ന്നു.