ഐഎസ്എല്ലിൽ എടികെ മോഹൻബഗാൻ തകർപ്പൻ ഫോം തുടരുന്നു. നോർത്ത് ഈസ്റ്റ് യുണൈറ്റഡിനെതിരെ ഏകപക്ഷീയമായ രണ്ട് ഗോളുകൾക്ക് തകർത്താണ് എടികെ മോഹൻബഗാൻ ലീഗിൽ വീണ്ടും തലപ്പത്തെത്തിയത്.
ഗോൾ രഹിതമായിരുന്നു ആദ്യ പകുതി. രണ്ടാം പകുതിയുടെ 51 മിനുട്ടിൽ സൂപ്പർ താരം റോയ് കൃഷ്ണ എടികെയെ മുന്നിൽ എത്തിച്ചു. കോർണർ കിക്കിൽ പ്രതിരോധ താരം ടിരിയുടെ പാസിൽ ഹെഡ്ഡറിലൂടെയാണ് റോയ് കൃഷ്ണ ഹൈലാൻഡേർസിന്റെ വലകുലുക്കിയത്.
ഏഴ് മിനുട്ടുകൾക്ക് ശേഷം എടികെ വീണ്ടും ലീഡ് ഉയർത്തി. കോർണർ കിക്ക് തന്നെയാണ് നോർത്ത് ഈസ്റ്റിന് വീണ്ടും വിനായായത്. കോർണർ കിക്കിൽ നിന്ന് ലഭിച്ച പന്തിൽ സന്ദേശ് ജിംഗാനെ തടയാനുള്ള ശ്രമത്തിൽ രണ്ട് നോർത്ത് ഈസ്റ്റ് താരങ്ങളുടെ കാലിൽ തട്ടി പന്ത് ഗോൾ ലൈൻ കടന്നു.
9 കളികളിൽ നിന്ന് 20 പോയന്റുമായി എടികെ വീണ്ടും ലീഗിൽ ഒന്നാം സ്ഥാനത്ത് തിരിച്ചെത്തി. 8 കളികളിൽ നിന്ന് 19 പോയിന്റുമായി മുംബൈ സിറ്റി എഫ്സി തൊട്ടടുത്തുണ്ട്. 9 കളികളിൽ നിന്ന് 11 പോയന്റോടെ ഹൈലാൻഡേഴ്സ് ആറാം സ്ഥാനത്താണ്.