പശ്ചിമബംഗാൾ കായിക-യുവജനകാര്യ മന്ത്രിയും മുൻ ഇന്ത്യൻ ക്രിക്കറ്റ് താരവുമായ ലക്ഷമി രത്തൻ ശുക്ല രാജിവെച്ചു. തൃണമുൽ കോൺഗ്രസ് പാർട്ടി അംഗത്വവും ഹൗറ ജില്ലാ പ്രസിഡന്റ് സ്ഥാനവും ശുക്ല രാജിവെച്ചിട്ടുണ്ട്. എംഎൽഎ സ്ഥാനം രാജിവെക്കില്ലെന്ന് ശുക്ലയുടെ അടുത്ത വൃത്തങ്ങൾ അറിയിച്ചു. തൃണമുൽ കോൺഗ്രസ് വിടാനുള്ള കാരണം ശുക്ല വെളിപ്പെടുത്തിയിട്ടില്ല. സജീവ രാഷ്ട്രീയം അവസാനിപ്പിക്കുകയാണെന്ന് മാത്രമാണ് ശുക്ല അറിയിച്ചിട്ടുള്ളത്. അതേ സമയം ശുക്ല ബിജെപിയിൽ ചേർന്നേക്കുമെന്ന് സൂചനയുണ്ട്.
മമത ബാനർജി മന്ത്രിസഭയിൽ നിന്ന് രാജിവെക്കുന്ന രണ്ടാമത്തെ മന്ത്രിയാണ് ശുക്ല. മമത ബാനർജിയുടെ വലംകൈയ്യായിരുന്ന സുവേന്ദു അധികാരി അടുത്തിടെ രാജിവെച്ച് ബിജെപിയിൽ ചേർന്നിരുന്നു. തുടർന്ന് പ്രതിപക്ഷത്തെ 4 എംഎൽഎമാരും ഒരു എംപിയും ബിജെപിയിൽ ചേർന്നിരുന്നു.
ഓൾറൗണ്ടറായിരുന്നു ലക്ഷമി രത്തൻ ശുക്ല ഇന്ത്യക്കായി 3 ഏകദിനങ്ങൾ കളിച്ചിട്ടുണ്ട്. 15 റൺസാണ് ഉയർന്ന സ്കോർ. ഒരു വിക്കറ്റ് നേടിയിട്ടുണ്ട്. ഫസ്റ്റ് ക്ലാസ് ക്രിക്കറ്റിൽ ബംഗാളിനായി 6217 റൺസ് താരം നേടിയിട്ടുണ്ട്. ഐപിഎല്ലിൽ കൊൽക്കൊത്ത, ഡൽഹി, ഹൈദരാബാദ് ടീമുകൾക്കായി കളത്തിൽ ഇറങ്ങിയിട്ടുണ്ട്. 34ാം വയസിൽ ശുക്ല 2015 ൽ ക്രിക്കറ്റിൽ നിന്ന് വിരമിച്ചു.
