നിർണായകമായ നിയമസഭാ തെരഞ്ഞെടുപ്പിൽ വമ്പൻ വാഗ്ദാനങ്ങളുമായി യുഡിഎഫ് പ്രകടനപത്രിക ഒരുങ്ങുന്നു. സംസ്ഥാനത്തെ പാവപ്പെട്ട കുടുംബങ്ങളുടെ അക്കൗണ്ടിൽ പ്രതിമാസം 6000 രൂപ ഉറപ്പുവരുത്തുന്ന പദ്ധതിയായിരിക്കും പ്രകടന പത്രികയിലെ പ്രധാന വാഗ്ദാനം. മിനിമം ഇൻകം ഗാരന്റി സ്കീം എന്ന പദ്ധതിയിലൂടെയാണ് ഇത് നടപ്പാക്കുക. കഴിഞ്ഞ ലോക്സഭാ തെരഞ്ഞെടുപ്പിൽ ദേശീയ തലത്തിൽ കോൺഗ്രസിന്റെ പ്രകടന പത്രികയിലെ പ്രധാന വാഗ്ദാനമായിരുന്നു ഇത്. ഇതിലൂടെ ദാരിദ്ര്യം പൂർണമായു തുടച്ചുനീക്കും എന്ന വാഗ്ദാനത്തോടെയാകും യുഡിഎഫ് തെരഞ്ഞെടുപ്പിൽ ജനങ്ങളെ സമീപിക്കുക. പ്രതിപക്ഷ നേതാവ് രമേശ് ചെന്നിത്തല ഫേസ്ബുക്കിലൂടെയാണ് യുഡിഎഫിന്റെ പ്രധാന വാഗ്ദാനം സംബന്ധിച്ച് പ്രാഥമിക വിവരം പുറത്തുവിട്ടത്.
ന്യായ് എന്ന പേരിൽ രാഹുൽ ഗാന്ധി വിഭാവനം ചെയ്ത പദ്ധതി യുഡിഎഫ് അധികാരത്തിൽ എത്തിയാൽ നടപ്പാക്കുമെന്നും ചെന്നിത്തല അറിയിച്ചു. ജനകീയ മാനിഫെസ്റ്റോയുമായാണ് യുഡിഎഫ് തെരഞ്ഞെടുപ്പിനെ നേരിടുകയെന്നും ചെന്നിത്തല പറഞ്ഞു. മാനിഫെസ്റ്റോയിലേക്ക് പൊതു ജനങ്ങൾക്ക് peoplesmanifesto2021@gmail.com എന്ന മെയിൽ ഐഡിയിലൂടെ അഭിപ്രായങ്ങളും നിർദ്ദേശങ്ങളും സമർപ്പിക്കാം. പ്രകടനപത്രികയിലെ മറ്റ് വാഗ്ദാനങ്ങളെ കുറിച്ചുള്ള വിവരങ്ങൾ പുറത്തുവിട്ടിട്ടില്ല.
പ്രധാന വാര്ത്തകള് മാത്രം ടെലഗ്രാമില് ലഭിക്കാന് ഈ ലിങ്ക് ക്ലിക്ക് ചെയ്യുക
ഇടതുപക്ഷ സർക്കാറിന്റെ ക്ഷേമ പെൻഷൻ പദ്ധതികളെ മറികടക്കുന്ന തരത്തിൽ തെരഞ്ഞെടുപ്പ് വാഗ്ദാനങ്ങൾ വേണമെന്ന് യുഡിഎഫിൽ നേരത്തെ തന്നെ ധാരണയുണ്ടായിരുന്നു. ക്ഷേമ പെൻഷനും സൗജന്യ ഭക്ഷ്യ ധാന്യ വിതരണവും അടുത്ത തെരഞ്ഞെടുപ്പിലും എൽഡിഎഫ് പ്രധാന പ്രചാരണ വിഷയമാക്കുമെന്നാണ് യുഡിഎഫ് കരുതുന്നത്. ഇത് മുന്നിൽ കണ്ട്, ജനങ്ങളെ ആകർഷിക്കുന്ന വാഗ്ദാനങ്ങളും വമ്പൻ പദ്ധതികളും പരിപാടികളുമാണ് യുഡിഎഫ് പ്രകടനപത്രികയിൽ ഒരുങ്ങുന്നത്.