അര്ണബിന്റെ ചാറ്റിനെ കുറിച്ച് മോദിയും ഷായും മറുപടി പറയണമെന്ന് മഹുവ മൊയ്ത്ര. അര്ണബ് ഗോസ്വാമി ബാര്ക്ക് മുന് സി.ഇ.ഒയുമായി നടത്തിയ വാട്സ് ആപ്പ് ചാറ്റുകള് പുറത്തുവന്നതോടെയാണ് പ്രധാനമന്ത്രി നരേന്ദ്ര മോദിയും ആഭ്യന്തര മന്ത്രി അമിത് ഷായും മറുപടി നല്കണമെന്നാണ് മഹുവ ആവശ്യപ്പെട്ടത്.
അര്ണബിന്റെ വിഖ്യാതമായ 'Nation Needs to Know' എന്ന പ്രൈം ടൈം തലക്കെട്ടോടു കൂടിയാണ് മഹുവയുടെ ട്വീറ്റ് തുടങ്ങുന്നത്. 'ബലാകോട്ട് ആക്രമണത്തെയും ആര്ട്ടിക്കിള് 370 റദ്ദാക്കുന്നതിനെയും കുറിച്ച് സര്ക്കാര് നേരത്തെ തന്നെ അര്ണബിന് വിവരം കൈമാറിയിരുന്നുവെന്നാണ് വാട്സ് ആപ്പ് ചാറ്റില് നിന്ന് വ്യക്തമാകുന്നത്. എന്താണ് സംഭവിക്കുന്നത്? മോദിയും ഷായും മറുപടി പറയാന് ബാധ്യസ്ഥരാണെന്ന് കരുതുന്നത് ഞാന് മാത്രമാണോ?' മഹുവ ചോദിച്ചു.
പുല്വാമ ആക്രമണവും ബലാക്കോട്ടില് ഇന്ത്യ നടത്തിയ തിരിച്ചടിയും അര്ണബ് ഗോസ്വാമി നേരത്തെ അറിഞ്ഞുവെന്നാണ് പുറത്തുവന്ന വാട്സ് ആപ്പ് ചാറ്റില് നിന്ന് വ്യക്തമാകുന്നത്.