കൊല്ക്കത്ത: ബിജെപി മാവോയിസ്റ്റുകളേക്കാള് അപകടകാരികളെന്ന് പശ്ചിമബംഗാള് മുഖ്യമന്ത്രി മമതാ ബാനര്ജി. തെരഞ്ഞെടുപ്പിന് മുന്നോടിയായി വ്യാജ വാഗ്ദാനങ്ങള് നല്കുകമാത്രമാണ് ബിജെപി ചെയ്യുന്നതെന്നും മമത ആരോപിച്ചു. ഒരുകാലത്ത് ഇടതുപക്ഷ തീവ്രവാദത്തിന്റെ കേന്ദ്രമായിരുന്ന പുരുലിയ ജില്ലയില് നടന്ന റാലിയില് ജനങ്ങളെ അഭിസംബോധന ചെയ്തുസംസാരിക്കുകയായിരുന്നു അവര്.
ബിജെപിയിലേക്ക് പോകാനാഗ്രഹിക്കുന്നവര്ക്ക് പോകാം എന്നാല് വസ്ത്രം മാറുന്നതുപോലെ പ്രത്യയശാസ്ത്രങ്ങള് മാറ്റാനാവില്ല, ഒരിക്കലും താന് ബിജെപിക്കു മുന്നില് തലകുനിക്കില്ലെന്ന് മമത കൂട്ടിച്ചേര്ത്തു. കഴിഞ്ഞ കുറച്ചുമാസങ്ങളിലായി നിരവധി തൃണമൂല് കോണ്ഗ്രസ് നേതാക്കളാണ് ബിജെപിയില് ചേര്ന്നത്.
ജംഗല്മഹല് പ്രദേശത്തെ ആദിവാസി ജനതയെ ബിജെപി വാഗ്ദാനങ്ങള് നല്കി തെറ്റിദ്ധരിപ്പിക്കുകയായിരുന്നു.ലോക്സഭാ തെരഞ്ഞെടുപ്പിലെ വിജയത്തിനുശേഷം ഒരിക്കല് പോലും ബിജെപി നേതാക്കള് അവരെ സന്ദര്ശിച്ചിട്ടില്ലെന്ന് മമത ആരോപിച്ചു. 2019 ലോക്സഭ തെരഞ്ഞെടുപ്പില് ജംഗല്മഹല് ഉള്പ്പെടെ പ്രദേശത്തെ എല്ലാ സീറ്റുകളിലും ബിജെപി സ്ഥാനാര്ത്ഥികളായിരുന്നു വിജയിച്ചത്.