പാറ്റ്‌ന: ആരോഗ്യനില വഷളായതിനെത്തുടര്‍ന്ന് ജയിലില്‍ കഴിയുന്ന മുന്‍ ബിഹാര്‍ മുഖ്യമന്ത്രിയും രാഷ്ട്രീയ ജനതാദള്‍ നേതാവുമായ ലാലു പ്രസാദ് യാദവിനെ ഡല്‍ഹി എയിംസിലേക്ക് മാറ്റും. ശ്വാസകോശ സംബന്ധമായ അസുഖത്തെത്തുടര്‍ന്ന് റാഞ്ചിയിലെ ആശുപത്രിയില്‍ ചികിത്സയിലായിരുന്നു ലാലു പ്രസാദ് യാദവ്. ലാലുവിന്റെ മകനും ആര്‍ജെഡി നേതാവുമായ തേജസ്വി യാദവും കുടുംബവും ഡല്‍ഹിയിലെ ആശുപത്രിയിലേക്ക് അദ്ദേഹത്തെ അനുഗമിക്കും.
അഴിമതിക്കേസില്‍ ജയിലിലാണ് അദ്ദേഹം. ജയില്‍ ഡോക്ടര്‍മാരുടെ റിപ്പോര്‍ട്ട് ലഭിച്ചതിനുശേഷമാവും അദ്ദേഹത്തെ ഡല്‍ഹി എയിംസിലേക്ക് മാറ്റുക. അദ്ദേഹത്തിന്റെ ആരോഗ്യ സ്ഥിതി ഗുരുതരമാണ്. വിദഗ്ദ ചികിത്സ ആവശ്യമുണ്ട്, ഡോക്ടര്‍മാരുടെ റിപ്പോര്‍ട്ട് വന്നതിനുശേഷം മുഖ്യമന്ത്രിയെ കാണുമെന്ന് തേജസ്വി യാദവ് പറഞ്ഞു. നേരത്തെ ലാലു പ്രസാദ് യാദവിന് ഹൃദയ ശസ്ത്രക്രിയ നടത്തിയിട്ടുണ്ട്. വൃക്കകളുടെ ഇരുപത്തിയഞ്ച് ശതമാനം മാത്രമാണ് പ്രവര്‍ത്തനക്ഷമം. ന്യൂമോണിയ ബാധിച്ചിട്ടുളള ലാലുവിന് ശ്വാസമെടുക്കാനും തടസമുളളതായി തേജസ്വി കൂട്ടിച്ചേര്‍ത്തു.
പ്രധാന വാര്‍ത്തകള്‍ മാത്രം ടെലഗ്രാമില്‍ ലഭിക്കാന്‍ ഈ ലിങ്ക് ക്ലിക്ക് ചെയ്യുക
2017 ഡിസംബര്‍ മുതല്‍ ലാലു പ്രസാദ് ജയിലിലാണ്. അദ്ദേഹത്തിന്റെ അഭാവത്തില്‍ മകന്‍ തേജസ്വി യാദവ് നേതൃത്വം ഏറ്റെടുക്കുകയും കഴിഞ്ഞ തെരഞ്ഞെടുപ്പില്‍ ശക്തമായ മുന്നേറ്റം കാഴ്ച്ചവെച്ചിരുന്നു.
