ഇടുക്കി ജില്ലയിലെ മുഖ്യമന്ത്രിയുടെ കേരള പര്യടന പരിപാടിക്ക് ക്ഷണിക്കാതെ എത്തിയ കോൺഗ്രസ് നേതാവിനെ പൊലീസ് അറസ്റ്റ് ചെയ്തു. തൊടുപുഴയിൽ സംഘടിപ്പിച്ച പരിപാടിക്കെത്തിയ കെപിസിസി അംഗം സിപി മാത്യുവിനെയാണ് പൊലീസ് അറസ്റ്റ് ചെയ്തത്. മുഖ്യമന്ത്രി സംസാരിക്കുന്ന ഹാളിലേക്ക് കടക്കുമ്പോഴാണ് മാത്യുവിനെ പൊലീസ് തടഞ്ഞത്. ക്ഷണിച്ചവരെ മാത്രമെ ഹാളിൽ പ്രവേശിപ്പിക്കൂ എന്ന് പൊലീസ് അറിയിച്ചു. തുടർന്ന് പൊലീസുമായി അൽപനേരം വാക്കുതർക്കമുണ്ടായി. അനുവാദമില്ലാതെ പ്രവേശിക്കാനാവില്ലെന്ന നിലപാടിൽ പൊലീസ് ഉറച്ചു നിന്നു.
ക്ഷണിക്കപ്പെട്ടവർക്ക് വേണ്ടിയുള്ള പരിപാടിയാണെന്ന് താൻ അറിഞ്ഞില്ലെന്ന് മാത്യു മാധ്യമങ്ങളോട് പറഞ്ഞു. ഇടുക്കിയിലെ കർഷക പ്രശ്നങ്ങൾ മുഖ്യമന്ത്രിയുടെ ശ്രദ്ധയിൽപ്പെടുത്താനാണ് എത്തിയതെന്നും മാത്യു വ്യക്തമാക്കി. മാധ്യമങ്ങളോട് സംസാരിക്കവെയാണ് മാത്യുവിനെ പൊലീസ് കസ്റ്റഡിയിൽ എടുത്തത്. ബലം പ്രയോഗം നടത്തിയ മാത്യുവിനെ പൊലീസ് തൂക്കിയെടുത്തു ജീപ്പിൽ കയറ്റി.
പ്രധാന വാര്‍ത്തകള്‍ മാത്രം ടെലഗ്രാമില്‍ ലഭിക്കാന്‍ ഈ ലിങ്ക് ക്ലിക്ക് ചെയ്യുക
മുഖ്യമന്ത്രിയുടെ കേരള പര്യടനത്തിലെ അവസാന പരിപാടിയാണ് ഇടുക്കിയിൽ സംഘടിപ്പിച്ചത്. മറ്റ് ജില്ലകളിലെ പര്യടനം കഴിഞ്ഞ മാസം പൂർത്തിയായിരുന്നു.
