ഡല്‍ഹി: വിവാദ കാര്‍ഷികനിയമങ്ങള്‍ക്കെതിരായി ഡല്‍ഹി അതിര്‍ത്തിയില്‍ രണ്ടുമാസത്തോളമായി പ്രതിഷേധിക്കുന്ന കര്‍ഷകരെ ദുരിതത്തിലാക്കി നാട്ടുകാരും. സിംഘു അതിര്‍ത്തിയിലാണ് സമരം ചെയ്യുന്ന കര്‍ഷകര്‍ക്കെതിരെ നാട്ടുകാര്‍ പ്രതിഷേധിക്കുന്നത്. ദേശീയപാതയില്‍ നിന്ന് കര്‍ഷകര്‍ പിരിഞ്ഞുപോകണമെന്നാണ് നാട്ടുകാരെന്ന് അവകാശപ്പെട്ടുവന്നവരുടെ ആവശ്യം.
മാസങ്ങളായുളള അവരുടെ പ്രതിഷേധം തങ്ങളുടെ വ്യവസായത്തെ സാരമായി ബാധിച്ചു, ദേശീയ പതാകയെ അപമാനിച്ച കര്‍ഷകരെ അനുകൂലിക്കില്ല എന്നാണ് നാട്ടുകാരില്‍ ചിലര്‍ അഭിപ്രായപ്പെട്ടത്. സിംഘുവിലേതിനു സമാനമാണ് ഗാസിപൂരിലെയും സാഹചര്യം. ഗാസിപൂരിലെ സമരഭൂമിയിലേക്കുളള വൈദ്യുതിയും ജലവിതരണവും യുപി സര്‍ക്കാര്‍ വിച്ഛേദിച്ചിരുന്നു. ജലവിതരണവും വൈദ്യുതിയും പുനസ്ഥാപിച്ചില്ലെങ്കില്‍ ഗാസിപൂരിലെ മുഴുവന്‍ പോലീസ് സ്‌റ്റേഷനുകളും ഉപരോധിക്കുമെന്ന് കര്‍ഷകസംഘടനകള്‍ അറിയിച്ചു. നിയമങ്ങള്‍ പിന്‍വലിക്കാതെ പിന്നോട്ടില്ലെന്ന നിലപാടില്‍ ഉറച്ചുനില്‍ക്കുകയാണ് കര്‍ഷകര്‍.
