ഉത്തരാഖണ്ഡ് ടീമിന്റെ പരിശീലക സ്ഥാനം രാജിവെച്ചതിന് പിന്നാലെ വര്ഗീയ ആരോപണം നേരിടുന്ന വസീം ജാഫറിന് പിന്തുണയുമായി ഇന്ത്യയുടെ ഇതിഹാസ സ്പിന്നര് അനില് കുംബ്ലെ. ജാഫര് ചെയ്തതാണ് ശരിയെന്നും എല്ലാവിധ പിന്തുണയും നല്കുന്നുവെന്നുമായിരുന്നു കുംബ്ലെ ട്വിറ്ററില് കുറിച്ചത്.
കഴിഞ്ഞ ദിവസമാണ് വസീം ജാഫര് ഉത്തരാഖണ്ഡ് ടീമിന്റെ പരിശീലകസ്ഥാനം രാജിവെച്ചത്. ടീം സിലക്ഷനില് ഉത്തരാഖണ്ഡ് ക്രിക്കറ്റ് അസോസിയേഷന് സെക്രട്ടറി മഹിം വര്മ ഉൾപ്പെടെയുള്ളർ വ്യാപകമായി ഇടപെടുന്നുവെന്ന് ആരോപിച്ചായിരുന്നു രാജി. എന്നാല്, വസീം ജാഫര് ഡ്രസ്സിങ് റൂമിനെ വർഗീയവല്കരിക്കാന് ശ്രമിക്കുന്നുവെന്നും മുസ്ലിം താരങ്ങൾക്ക് ടീമില് മുൻഗണന നൽകുകയാണെന്നും ആരോപിച്ച് ഉത്തരാഖണ്ഡ് ക്രിക്കറ്റ് അസോസിയേഷന് സെക്രട്ടറി മഹിം വര്മ രംഗത്തെത്തുകയായിരുന്നു.
വര്ഗീയതയുടെ ചുവടുപിടിച്ച് വിവാദം കൊഴുത്തതോടെ വസീം ജാഫറും ഇതിനെതിരെ ശക്തമായ ഭാഷയില് പ്രതികരിച്ചു. തുടര്ന്നാണ് അനില് കുംബ്ലെ അടക്കമുള്ളവര് ജാഫറിനെ പിന്തുണച്ച് രംഗത്തെത്തിയത്. നിലപാടില് ശക്തമായി തുടരണമെന്നും പടി അര്ഹിക്കാത്ത കാര്യങ്ങളെ അവഗണിക്കണമെന്നുമായിരുന്നു മുതിര്ന്ന മാധ്യമപ്രവര്ത്തന് രാജ്ദീപ് സര്ദേശായി വസീം ജാഫറിനു പിന്തുണ നല്കിക്കൊണ്ട് പറഞ്ഞത്.