തിരുവനന്തപുരം: ശബരിമല, പൗരത്വനിയമ കേസുകള് പിൻവലിക്കാൻ സംസ്ഥാന മന്ത്രിസഭാ യോഗത്തില് സുപ്രധാന തീരുമാനം. ഗുരുതര ക്രിമിനൽ സ്വഭാവമില്ലാത്ത കേസുകളാണ് പിൻവലിക്കുന്നത്. ശബരിമല സമരവുമായി ബന്ധപ്പെട്ട കേസുകള് പിന്വലിക്കണമെന്ന് എന്.എസ്.എസ് അടക്കമുള്ള സംഘടനകളും കോൺഗ്രസും ബിജെപിയും ആവശ്യപ്പെട്ടിരുന്നു. നിയമസഭാ തെരഞ്ഞെടുപ്പ് പടിവാതില്ക്കലെത്തി നില്ക്കുന്ന സാഹചര്യത്തില് കൂടിയാണ് കേസുകള് പിന്വലിക്കുന്നത്.
സര്ക്കാരിന്റെ വൈകിവന്ന വിവേകമാണിതെന്ന് പ്രതിപക്ഷ നേതാവ് രമേശ് ചെന്നിത്തല പ്രതികരിച്ചു. ഗത്യന്തരമില്ലാതെയുള്ള തീരുമാനമാണിതെന്ന് മുസ്ലിം ലീഗും അഭിപ്രായപ്പെട്ടു. ഈയിടെ തമിഴ്നാട് സര്ക്കാര് സിഎഎ പ്രതിഷേധക്കാര്ക്കെതിരെയുള്ള കേസുകള് പിന്വലിച്ചിരുന്നു. കേന്ദ്രസര്ക്കാര് പാസാക്കിയ പൗരത്വ ഭേദഗതി നിയമത്തിനെതിരെ വന് പ്രതിഷേധമാണ് കേരളത്തിലുണ്ടായിരുന്നത്.
ശബരിമലയിലെ യുവതീ പ്രവേശവുമായി ബന്ധപ്പെട്ട 2018ലെ സുപ്രിം കോടതി വിധിക്ക് പിന്നാലെയുണ്ടായ പ്രതിഷേധങ്ങളിൽ അമ്പതിനായിരത്തോളം പേർക്കെതിരെയാണ് കേസെടുത്തിട്ടുള്ളത്. പൗരത്വ നിയമ ഭേദഗതിക്കെതിരെ കേരളത്തിൽ സമരം ചെയ്തതിന് 529 കേസുകളും രജിസ്റ്റര് ചെയ്തിട്ടുണ്ട്.