ഡല്‍ഹി: അഹമ്മദാബാദിലെ സര്‍ദാര്‍ വല്ലഭായ് പട്ടേല്‍ മൊട്ടേര ക്രിക്കറ്റ് സ്റ്റേഡിയത്തിന് പ്രധാനമന്ത്രി നരേന്ദ്ര മോദിയുടെ പേരു നല്‍കിയതിനും അദാനി, അംബാനി തുടങ്ങിയ കുത്തക കമ്പനികള്‍ക്ക് ഗാലറികള്‍ നല്‍കിയതിതിനും എതിരെ ശക്തമായ ആക്ഷേപമുന്നയിച്ച് കോണ്‍ഗ്രസ് നേതാവ് രാഹുല്‍ ഗാന്ധി രംഗത്ത് വന്നു.
'നാം രണ്ട് നമുക്ക് രണ്ട്' എന്ന കുടുംബാസൂത്രണത്തിന്റെ പരസ്യവാചകം ഹാഷ് ടാഗായി ചേര്‍ത്തുകൊണ്ടാണ് രാഹുല്‍ ഗാന്ധിയുടെ ട്വീറ്റ്. സ്റ്റേഡിയത്തിലെ രണ്ട് ഗാലറികള്‍ക്ക് അദാനി ഏന്‍ഡ്, അംബാനി ഏന്‍ഡ് എന്ന് പേരു വെച്ചതിലൂടെ സത്യം പുറത്തുവന്നിരിക്കുകയാണ്. ഇങ്ങനെയൊക്കെയാണ് സത്യം പുറത്തുവരികയെന്നും അദാനി-അംബാനി-മോദി കൂട്ടുകെട്ടിനെ കളിയാക്കിക്കൊണ്ട് രാഹുല്‍ ട്വീറ്ററില്‍ കുറിച്ചു.
ലോകത്തിലെ ഏറ്റവും വലിയ ക്രിക്കറ്റ് സ്റ്റേഡിയമായ മൊട്ടേര ക്രിക്കറ്റ് സ്റ്റേഡിയത്തിന് പേരു മാറ്റിയതിനെതിരെ വലിയ വിമര്‍ശനമാണ് ഉയര്‍ന്നുവരുന്നത്. സ്വാതന്ത്ര്യ സമര സേനാനിയും ഇന്ത്യയുടെ ഉരുക്ക് മനുഷ്യന്‍ എന്ന് കീര്‍ത്തികേട്ട നേതാവുമായ സര്‍ദാര്‍ വല്ലഭായ് പട്ടേലിന്റെ പേരിലുള്ള സ്റ്റേഡിയത്തിന്‍റെ പേര് മാറ്റിക്കൊണ്ട് കഴിഞ്ഞ ദിവസമാണ് രാഷ്ട്രപാതി രാമനാഥ് കൊവിന്ദ് പ്രഖ്യാപനം നടത്തിയത്. അഭ്യന്തര മന്ത്രി അമിത്ഷാ, മകനും ബി സി സി ഐ സെക്രട്ടറിയുമായ ജയ്‌ ഷാ, എന്നിവര്‍ പങ്കെടുത്ത ചടങ്ങിലായിരുന്നു പ്രഖ്യാപനം. ഒരുലക്ഷത്തി മുപ്പത്തിരണ്ടായിരം പേര്‍ക്ക് ഇരുന്ന് കളികാണാന്‍ സൌകര്യമുള്ള സര്‍ദാര്‍ വല്ലഭായ് പട്ടേല്‍ സ്റ്റേഡിയം വലുപ്പത്തിന്‍റെ കാര്യത്തില്‍ ലോകത്തില്‍ രണ്ടാമതാണ്‌.
