ലക്നൗ: ഉത്തര്പ്രദേശില് വര്ഗീയതയോ വിവേചനമോ ഇല്ലെന്ന് മുഖ്യമന്ത്രി യോഗി ആദിത്യനാഥ്. സംസ്ഥാനത്തെ ജനസംഖ്യയുടെ പത്തൊമ്പത് ശതമാനം മുസ്ലീം ജനവിഭാഗമാണ്, ക്ഷേമപദ്ധതികളുടെ 30 ശതമാനം ഉപഭോക്താക്കളും മുസ്ലീങ്ങളാണെന്നും അദ്ദേഹം പറഞ്ഞു. കേന്ദ്രഭവന പദ്ധതി, സൗജന്യ വൈദ്യുതി കണക്ഷന്, ഉജ്ജ്വല പദ്ധതി പ്രകാരം സൗജന്യ പാചക വാതക കണക്ഷന്, ആയുഷ്മാന് ഭാരത് ആരോഗ്യ പദ്ധതി തുടങ്ങിയ പദ്ധതികളുടെ നടത്തിപ്പിനെക്കുറിച്ച് നിയമസഭയില് സംസാരിക്കുകയായിരുന്നു അദ്ദേഹം.
സത്യസന്ധവും സുതാര്യവുമായ രീതിയിലാണ് സംസ്ഥാന സര്ക്കാര് മുന്നോട്ടുപോവുന്നതെന്നും യോഗി ആദിത്യനാഥ് അവകാശപ്പെട്ടു. സര്ക്കാര് ആരോടും വിവേചനം കാണിച്ചിട്ടില്ല. പദ്ധതികള് ഗുണഭോക്താക്കളുടെ പടിവാതില്ക്കലെത്തിക്കാനായി മാത്രമാണ് പ്രവര്ത്തിച്ചിട്ടുളളതെന്നും അദ്ദേഹം പറഞ്ഞു. സ്വാതന്ത്ര്യം ലഭിച്ച കാലത്ത് യുപിയുടെ സമ്പദ് വ്യവസ്ഥ ഏറെ മുന്നിലായിരുന്നു പിന്നീട് സമാജ് വാദി പാര്ട്ടി, ബഹുജന് സമാജ് പാര്ട്ടി, കോണ്ഗ്രസ് തുടങ്ങി അധികാരത്തില് വന്ന പാര്ട്ടികളെല്ലാം യുപിയുടെ സമ്പദ് വ്യവസ്ഥയെ പിന്നോട്ടടിക്കുകയാണ് ചെയ്തതെന്നും അദ്ദേഹം പറഞ്ഞു. എന്നാല് ഇപ്പോള് വികസനത്തിന്റെ മാതൃകകളാക്കി അവതരിപ്പിച്ച സംസ്ഥാനങ്ങളേക്കാള് ഏറെ മുന്നിലാണ് ഉത്തര്പ്രദേശ് എന്ന് യോഗി അവകാശപ്പെടുന്നു.