കൊല്‍ക്കത്ത: പശ്ചിമബംഗാള്‍ മുഖ്യമന്ത്രി മമത ബാനര്‍ജിയെ പിന്തുണച്ച് ശിവസേന. വരാനിരിക്കുന്ന നിയമസഭാ തെരഞ്ഞെടുപ്പില്‍ സ്ഥാനാര്‍ത്ഥികളെ നിര്‍ത്തില്ലെന്നും ശിവസേന വ്യക്തമാക്കി. 'യഥാര്‍ത്ഥ ബംഗാള്‍ കടുവ' എന്നാണ് ശിവസേന നേതാവ് സഞ്ജയ് റാവത്ത് മമതയെ വിശേഷിപ്പിച്ചത്.
നിലവിലെ സാഹചര്യത്തില്‍ മമത ഒറ്റയ്ക്കാണ് മറ്റു പാര്‍ട്ടികള്‍ക്കെതിരെ പോരാടുന്നത്. ചിലര്‍ മാധ്യമങ്ങളെ പണമെറിഞ്ഞ് മമതയ്‌ക്കെതിരെ ഉപയോഗിക്കുകയാണ്. അതിനാല്‍ പശ്ചിമബംഗാള്‍ തെരഞ്ഞെടുപ്പില്‍ മമതയ്ക്ക് ഐക്യദാര്‍ഢ്യം പ്രഖ്യാപിച്ചുകൊണ്ട് തെരഞ്ഞെടുപ്പില്‍ മത്സരിക്കില്ലെന്ന് ശിവസേന തീരുമാനിച്ചു എന്നായിരുന്നു സഞ്ജയ് റാവത്തിന്റെ ട്വീറ്റ്.
പശ്ചിമബംഗാളില്‍ മാര്‍ച്ച് 27-മുതല്‍ ഏപ്രില്‍ 29-വരെ എട്ട് ഘട്ടങ്ങളിലായാണ് തെരഞ്ഞെടുപ്പ് നടക്കുക. മെയ് രണ്ടിന് ഫലപ്രഖ്യാപനം ഉണ്ടാവും. വരുന്ന തെരഞ്ഞെടുപ്പില്‍ മമതയോടൊപ്പം നില്‍ക്കുമെന്നും മമത ബാനര്‍ജിയുടെ വിജയം ആഗ്രഹിക്കുന്നതായും സഞ്ജയ് റാവത്ത് പറഞ്ഞു. ബിജെപി സഖ്യകക്ഷിയായിരുന്ന ശിവസേന 2019-ലാണ് പാര്‍ട്ടി വിട്ട് മഹാരാഷ്ട്രയില്‍ കോണ്‍ഗ്രസും എന്‍സിപിയുമായി ചേര്‍ന്ന് മഹാ വികാസ് അഘാഡി സര്‍ക്കാര്‍ രൂപീകരിച്ചത്.
