കോഴിക്കോട്: വരാനിരിക്കുന്ന നിയമസഭാ തെരഞ്ഞെടുപ്പില് സംവരണ മണ്ഡലമായ ബാലുശ്ശേരിയില് നടന് ധര്മ്മജന് ബോള്ഗാട്ടിയെ മത്സരിപ്പിക്കരുതെന്ന് ബാലുശ്ശേരി മണ്ഡലം കമ്മിറ്റി. ധര്മ്മജന് മത്സരിക്കുന്നത് യു.ഡി.എഫിന് ക്ഷീണം ചെയ്യുമെന്നാണ് വിലയിരുത്തല്. നടിയെ ആക്രമിച്ച കേസില് പ്രതിയായ ദിലീപിനെ പിന്തുണച്ചത് ചര്ച്ച ചെയ്യപ്പെടുമെന്ന് മണ്ഡലം കമ്മിറ്റി കെ.പി.സി.സിക്ക് നല്കിയ കത്തില് പറയുന്നു.
തെരഞ്ഞെടുപ്പ് തിയ്യതി പ്രഖ്യാപിക്കുന്നതിന് മുമ്പ് തന്നെ ബാലുശ്ശേരി കേന്ദ്രീകരിച്ച് ധര്മ്മജന് ബോള്ഗാട്ടി പ്രവര്ത്തനം തുടങ്ങിയിരുന്നു. സ്ഥാനാര്ത്ഥികളെ പ്രഖ്യാപിക്കുന്നതിന് മുമ്പ് തന്നെ പ്രവര്ത്തനം തുടങ്ങിയതും മാധ്യമങ്ങളോട് പ്രതികരിച്ചതും കോണ്ഗ്രസ് നേതൃത്വത്തിലും അസംതൃപ്തി ഉണ്ടാക്കിയിട്ടുണ്ട്. നിലവില് മുസ്ലിം ലീഗാണ് ബാലുശ്ശേരിയില് മത്സരിക്കുന്നത്. ഇത് കോണ്ഗ്രസ് ഏറ്റെടുത്ത് ധര്മ്മജനെ മല്സരിപ്പിക്കാനാണ് ആലോചന. പതിറ്റാണ്ടുകളായി എല്.ഡി.എഫ് മണ്ഡലമാണ് ബാലുശ്ശേരി.
കെ.പി.സി.സിയുടെ പരിഗണനയില് ധര്മ്മജന് ബോള്ഗാട്ടിക്ക് പുറമേ ദളിത് ആക്ടിവിസ്റ്റ് വിപിന് കൃഷ്ണന്, എന്.ജി.ഒ അസോസിയേഷന് നേതാവ് മധു എന്നിവരുടെ പേരുകളാണ് ഉള്ളത്. എന്നാല്, ധര്മ്മജന് പകരം യുവസ്ഥാനാര്ത്ഥിയെ നിര്ത്തണമെന്നാണ് യു.ഡി.എഫ് മണ്ഡലം കമ്മിറ്റിയുടെ നിര്ദേശം. വിദ്യാഭ്യാസ യോഗ്യതയും പരിഗണിക്കണമെന്നും കത്തില് ആവശ്യപ്പെട്ടിട്ടുണ്ട്.