കൊല്‍ക്കത്ത : ബിജെപിക്കെതിരെ രൂക്ഷ വിമര്‍ശനവുമായി മുന്‍ കേന്ദ്രമന്ത്രിയും ബിജെപി നേതാവുമായിരുന്ന യശ്വന്ത് സിന്‍ഹ. ആരാണ് ബിജെപിക്കൊപ്പം നില്‍കുക, എല്ലാം തല്ലി തകര്‍ത്ത് വെട്ടിപിടിക്കാന്‍ മാത്രമാണ് ബിജെപി ശ്രമിക്കുന്നത് സിന്‍ഹ പറഞ്ഞു. തൃണമൂല്‍ കോണ്‍ഗ്രസില്‍ ചേര്‍ന്നതിന് പിന്നാലെയാണ് യശ്വന്ത് ബിജെപിക്കെതിരായ ആരോപണം ഉന്നയിച്ചിരിക്കുന്നത്.
ഇപ്പോള്‍ ബിജെപിയെ നിയന്ത്രിക്കാന്‍ ആരുമില്ല, അടല്‍ ബിഹാരിയുടെ കാലഘട്ടത്തില്‍ ബിജെപി സമവായത്തില്‍ വിശ്വസിച്ചിരുന്നു, അകാലിദള്‍, ബി.ജെ.ഡി തുടങ്ങിയ സഖ്യ കക്ഷികളെല്ലാം ബിജെപി വിട്ടു ഇനി ആരാണ് ബിജെപിക്കൊപ്പമുള്ളതെന്നും യശ്വന്ത് സിന്‍ഹ ചോദിച്ചു.
കഴിഞ്ഞ ദിവസമാണ് യശ്വന്ത് സിന്‍ഹ തൃണമൂല്‍ കോണ്‍ഗ്രസില്‍ ചേര്‍ന്നത്. തൃണമൂല്‍ നേതാക്കളായ സുദീപ് ബന്ദോപാധ്യായ, ഡെറക് ഒ ബ്രയന്‍, സുബ്രത മുഖര്‍ജി എന്നിവരുടെ സാന്നിദ്ധ്യത്തിലായിരുന്നു യശ്വന്ത് സിന്‍ഹ തൃണമൂല്‍ പാര്‍ട്ടി അംഗത്വം സ്വീകരിച്ചത്. പശ്ചിമബംഗാളില്‍ കേരളത്തോടൊപ്പം തെരഞ്ഞെടുപ്പ് നടക്കാനിരിക്കെയാണ് യശ്വന്ത് സിന്‍ഹ തൃണമൂലില്‍ ചേരുന്നത്. ജനതാദളില്‍ നിന്ന് ബിജെപിയിലെത്തിയ യശ്വന്ത് സിന്‍ഹ, വി പി സിംഗ്, ചന്ദ്രശേഖര്‍, എ ബി വാജ്‌പേയി എന്നിവരുടെ നേതൃത്വത്തിലുളള മന്ത്രിസഭകളില്‍ ധനമന്ത്രിയായിരുന്നു. അദ്ദേഹം 2018-ല്‍ ബിജെപിയില്‍ നിന്ന് രാജിവെച്ചിരുന്നു.
പശ്ചിമബംഗാള്‍ നിയമസഭാ തെരഞ്ഞെടുപ്പ് മാര്‍ച്ച് 27-നാണ് ആരംഭിക്കുക. എട്ട് ഘട്ടങ്ങളിലായാണ് തെരഞ്ഞെടുപ്പ് നടക്കുക. ഇത്തവണത്തെ തെരഞ്ഞെടുപ്പില്‍ മുഖ്യമന്ത്രി മമത ബാനര്‍ജി നയിക്കുന്ന തൃണമൂല്‍ കോണ്‍ഗ്രസ് ബിജെപിയില്‍ നിന്ന് വലിയ വെല്ലുവിളിയാണ് നേരിടുന്നത്. കഴിഞ്ഞ കുറേ ദിവസങ്ങളിലായി നിരവധി തൃണമൂല്‍ നേതാക്കളാണ് ബിജെപിയിലേക്ക് ചേക്കേറിയത്. മമതയുടെ വലംകൈയ്യായി പ്രവര്‍ത്തിച്ചിരുന്ന സുവേന്ദു അധികാരി ചേര്‍ന്നതിനു പിന്നാലെയാണ് നിരവധി തൃണമുല്‍ നേതാക്കള്‍ ബിജെപിയില്‍ എത്തിയത്. ഇത്തവണ നന്ദിഗ്രാമില്‍ മമത ബാനര്‍ജിയെ നേരിടുന്നത് സ്വന്തം മന്ത്രിസഭയില്‍ അംഗമായിരുന്ന സുവേന്ദു അധികാരിയാണ്.
