പ്രതിഷേധങ്ങളുടെ പശ്ചാത്തലത്തിൽ കോൺഗ്രസ് സ്ഥാനാർത്ഥി പട്ടികയിൽ മാറ്റം വരുത്തില്ലെന്ന് എഐസിസി ജനറൽ സെക്രട്ടറി താരിഖ് അൻവർ. കേരളത്തിലെ മുതിർന്ന നേതാക്കളുമായി ചർച്ച നടത്തിയാണ് സ്ഥാനാർത്ഥി പട്ടിക തയ്യാറാക്കിയതെന്നും അദ്ദേഹം പറഞ്ഞു. കേരളത്തിന്റെ ചുമതലയുള്ള എഐസിസി ജനറൽ സെക്രട്ടറിയാണ് താരിഖ് അൻവർ.
സ്ഥാനാർത്ഥി പട്ടികക്കെതിരെ വ്യാപകമായ പരാതി ഉയർന്ന സാഹചര്യത്തിലാണ് കോൺഗ്രസ് ഹൈക്കമാന്റിന്റെ പ്രതികരണം. സ്ഥാനാർത്ഥി നിർണയത്തിനെതിരായ മുതിർന്ന നേതാക്കളുടെ പരസ്യ പ്രതികരണത്തിൽ താരിഖ് അൻവർ അസംതൃപ്തി പ്രകടിപ്പിച്ചു. ഇരിക്കൂർ മണ്ഡലത്തിലെ സ്ഥാനാർത്ഥി നിർണയവുമായി ബന്ധപ്പെട്ട പ്രശ്നങ്ങൾ പരിഹരിക്കും. വിവിധ സമിതികളിൽ ചർച്ച ചെയ്താണ് സ്ഥാനാർത്ഥികളെ തീരുമാനിച്ചത്. അതിനാൽ തന്നെ മാറ്റത്തിന് സാധ്യതകളില്ല. സ്ഥാനാർത്ഥി നിർണയം സംബന്ധിച്ച തർക്കം ഉടൻ കെട്ടടങ്ങും.
കെപിസിസി ആസ്ഥാനത്ത് വെച്ച് തലമുണ്ഡനം ചെയ്ത ലതികാ സുഭാഷിന്റെ നടപടി ഗൗരവമായാണ് പാർട്ടികാണുന്നത്. കടുത്ത അച്ചടക്കലംഘനമാണ് ഇതെന്നും താരിഖ് അൻവർ പറഞ്ഞു. പട്ടികയിൽ സ്തീകൾ കുറവാണെന്ന അഭിപ്രായം തനിക്കും ഉണ്ടെന്നും താരിഖ് അൻവർ പറഞ്ഞു.