ജ്യോതിരാദിത്യ സിന്ധ്യ പുറത്തുപോയതല്ല, കോൺഗ്രസ് സിന്ധ്യയെ പുറത്താക്കിയതാണെന്ന് എഐസിസി ജനറൽ സെക്രട്ടറി കെ.സി. വേണുഗോപാൽ. പാർട്ടി വിരുദ്ധ പ്രവർത്തനം നടത്തിയതിനു കോൺഗ്രസിൽ നിന്നു സിന്ധ്യയെ പുറത്താക്കുകയായിരുന്നുവെന്ന് വേണുഗോപാൽ അവകാശപ്പെട്ടു
'പാർട്ടി വിരുദ്ധ പ്രവർത്തനം നടത്തിയ ജ്യോതിരാദിത്യ സിന്ധ്യയെ അടിയന്തര പ്രാബല്യത്തോടെ പുറത്താക്കികൊണ്ടുള്ള ഉത്തരവിൽ കോൺഗ്രസ് അദ്ധ്യക്ഷ ഒപ്പുവച്ചിരുന്നു'- കെ.സി വേണുഗോപാൽ പറഞ്ഞു. സോണിയാ ഗാന്ധിക്കു സിന്ധ്യ രാജിക്കത്തു നൽകിയതിനു പിന്നാലെയായിരുന്നു വേണുഗോപാലിന്റെ പ്രതികരണം.
മദ്ധ്യപ്രദേശിലെ കോൺഗ്രസ് സർക്കാരിനെ വൻ പ്രതിസന്ധിയിലാക്കിയാണ് ജ്യോദിരാത്യ സിന്ധ്യ പാർട്ടിയിൽ നിന്ന് രാജിവെച്ചിരിക്കുന്നത്. പ്രധാനമന്ത്രി നരേന്ദ്ര മോദി, ആഭ്യന്തര മന്ത്രി അമിത് ഷാ എന്നിവരുമായി സിന്ധ്യ കൂടിക്കാഴ്ച നടത്തിയ ശേഷമാണ് രാജി പ്രഖ്യാപിച്ചത്. പ്രധാനമന്ത്രിയുടെ വസതിയിലായിരുന്നു കൂടിക്കാഴ്ച. സിന്ധ്യക്ക് കേന്ദ്ര മന്ത്രിസ്ഥാനം വാഗ്ദാനം ചെയ്തതായാണ് റിപ്പോർട്ട്.