കൊല്‍ക്കത്ത: പശ്ചിമബംഗാളിലും അസമിലും ആദ്യഘട്ട തെരഞ്ഞെടുപ്പ് ആരംഭിച്ചു. പശ്ചിമബംഗാളില്‍ മുപ്പത് സീറ്റുകളിലേക്കും അസമില്‍ 47 സീറ്റുകളിലേക്കുമുളള വോട്ടെടുപ്പാണ് ഇന്ന് നടക്കുക. രാവിലെ ഏഴ് മണിക്ക് ആരംഭിക്കുന്ന പോളിംഗ് വൈകുന്നേരം ഏഴ് മണിക്കാണ് അവസാനിക്കുക. കൊവിഡ് മാനദണ്ഡങ്ങള്‍ പാലിച്ചായിരിക്കും ക്രമീകരണങ്ങള്‍.
പശ്ചിമബംഗാളിലെ പുരുളിയ, ബങ്കുര, വെസ്റ്റ് മേദ്‌നിപൂര്‍, ഈസ്റ്റ് മേദ്‌നിപൂര്‍ തുടങ്ങി അഞ്ച് ജില്ലകളിലായി 73 ലക്ഷത്തോളം വോട്ടര്‍മാരും അസമില്‍ 81 ലക്ഷത്തോളം വോട്ടര്‍മാരുമാണ് ആദ്യഘട്ടത്തില്‍ വോട്ട് ചെയ്യാനായി എത്തുക. പശ്ചിമബംഗാളില്‍ എട്ട് ഘട്ടങ്ങളിലായും അസമില്‍ മൂന്ന് ഘട്ടങ്ങളിലുമായാണ് തെരഞ്ഞെടുപ്പ് നടക്കുക.
തെരഞ്ഞെടുപ്പ് ദിവസം അക്രമങ്ങളുണ്ടാവാതിരിക്കാന്‍ തെരഞ്ഞെടുപ്പ് കമ്മീഷന്‍ കേന്ദ്ര സേനയെ വിന്യസിച്ചിട്ടുണ്ട്. 10,288 പോളിംഗ് ബൂത്തുകളിലേക്കാണ് വിന്യസിച്ചിരിക്കുന്നത്. ക്രമസമാധാനപാലനത്തിന് കേന്ദ്രസേനയെക്കൂടാതെ സംസ്ഥാന പൊലീസിനെയും വിന്യസിക്കും.
