സേലം: ബിജെപിക്കെതിരായി പോരാടാന് രാജ്യത്തെ പ്രതിപക്ഷ പാര്ട്ടികളെ ഒന്നിപ്പിക്കാനായി രാഹുല് ഗാന്ധി നേതൃത്വം നല്കണമെന്ന് ഡിഎംകെ നേതാവ് എം കെ സ്റ്റാലിന്. തമിഴ്നാട് തെരഞ്ഞെടുപ്പിനോടനുബന്ധിച്ച് സേലത്ത് നടന്ന പ്രചരണറാലിക്കിടെ സംസാരിക്കുകയായിരുന്നു അദ്ദേഹം.
''ഇന്ത്യ ഇപ്പോള് ഫാസിസ്റ്റ് സര്ക്കാരിന്റെ കയ്യില് കിടന്ന് ഞെരുങ്ങുകയാണ്. ഇപ്പോള് ഇന്ത്യയെ സംരക്ഷിക്കേണ്ട ഉത്തരവാദിത്വം താങ്കള്ക്കുണ്ട്. 37 ശതമാനം ആളുകള് മാത്രമാണ് സര്ക്കാരുണ്ടാക്കാനായി ബിജെപിയ്ക്ക് വോട്ട് ചെയ്തത്. അതിന്റെ അര്ത്ഥം 63 ശതമാനം ജനങ്ങളും ബിജെപിക്കെതിരായി വിവിധ പാര്ട്ടികള്ക്കായി വോട്ട് ചെയ്തുവെന്നാണ്. പ്രതിപക്ഷ പാര്ട്ടികളെ ഒന്നിപ്പിക്കാനായി മുന്നോട്ട് വന്ന് രാജ്യത്തെ നയിക്കാന് നിങ്ങളോട് ആവശ്യപ്പെടുകയാണ് ''- രാഹുല് ഗാന്ധിയോട് സ്റ്റാലിന് പറഞ്ഞു.
ഐഎഎഡിഎംകെ പഴയതുപോലെയല്ല. അതൊരു മുഖംമൂടിയാണ്, ആ മുഖംമൂടി അഴിച്ചാല് എഐഎഡിഎംകെയെ അല്ല ആര്എസ്എസിനെയും ബിജെപിയെയുമാണ് കാണാനാവുകയെന്ന് രാഹുല് പറഞ്ഞു. തമിഴ്നാട് മുഖ്യമന്ത്രി എടപ്പാടി പളനിസ്വാമി നരേന്ദ്രമോദിയുടെയും അമിത്ഷായുടെയും മുന്നില് തലകുനിച്ചുനില്ക്കുന്നത് അദ്ദേഹം അഴിമതിക്കാരനായതുകൊണ്ടാണ്. നേരായ വഴിയില് സഞ്ചരിക്കുന്നവര് ഒരിക്കലും അവരുടെ മുന്നില് തലകുനിക്കില്ലെന്നും രാഹുല് പറഞ്ഞു. തമിഴ്നാട് നിയമസഭ തെരഞ്ഞെടുപ്പില് ഡിഎംകെ സഖ്യകക്ഷിയായ കോണ്ഗ്രസ് ഇരുപത്തിയഞ്ച് സീറ്റുകളിലാണ് മത്സരിക്കുന്നത്.