ഡല്ഹി: ഇസ്രത്ത് ജഹാന് വ്യാജ ഏറ്റുമുട്ടല് കേസില് മൂന്ന് പ്രതികളെക്കൂടി വെറുതെ വിട്ടു. ഐപിഎസ് ഉദ്യോഗസ്ഥനായ ജിഎസ് സിംഗാള്, റിട്ട. പൊലീസ് ഉദ്യോഗസ്ഥന് തരുണ് ബരോട്ട്, കമാന്ഡോ ഉദ്യോഗസ്ഥന് അനജൂ ചൗദരി എന്നിവരെയാണ് അഹമ്മദാബാദ് പ്രത്യേക സിബി ഐ കോടതി വെറുതെവിട്ടത്. ഇതോടെ കേസിലെ മുഴുവന് പ്രതികളും ജയില് മോചിതരായി. നേരത്തെ ഇസ്രത്ത് ജഹാന് കേസില് നാല് പേരേ കോടതി വെറുതെ വിട്ടിരുന്നു.
ഇസ്രത്ത് ജഹാന്, പ്രണേഷ് പിളള, അംജദ് അലി റാണ, സീഷന് ജോഹര് എന്നിവരെ 2004 ജൂണ് 15-നാണ് അഹമ്മദാബാദ് സിറ്റി ഡിറ്റക്ഷന് ഓഫ് ക്രൈം ബ്രാഞ്ച് കൊലപ്പെടുത്തിയത്. അന്നത്തെ ഗുജറാത്ത് മുഖ്യമന്ത്രിയായിരുന്ന നരേന്ദ്രമോദിയെ വധിക്കാനെത്തിയ ലഷ്കര് ഇ തായിബ പ്രവര്ത്തകരാണ് കൊല്ലപ്പെട്ട നാലുപേരുമെന്ന് ഡിസിബി അവകാശപ്പെട്ടിരുന്നു.
2013ല് സമര്പ്പിച്ച കുറ്റപത്രത്തില് പിപി പാണ്ഡെ, വന്സാരെ, എന്കെ അമിന്, സിംഗാല്, ബാരറ്റ്, ചൗദരി ജെജി പര്മാര് എന്നിവരെ പ്രതികളായി ഉള്പ്പെടുത്തിയിരുന്നു. കൊലപാതകം, തട്ടിക്കൊണ്ടുപോകല്, തെളിവുനശിപ്പിക്കല് തുടങ്ങിയ കുറ്റങ്ങളാണ് ഇവര്ക്കെതിരെ ചുമത്തിയിരുന്നത്.