കൊല്ക്കത്ത: ബിജെപിയെ പരാജയപ്പെടുത്താനായി രാജ്യത്തെ പ്രതിപക്ഷ പാര്ട്ടികള് ഒരുമിച്ച് നില്ക്കണമെന്ന് പശ്ചിമബംഗാള് മുഖ്യമന്ത്രി മമത ബാനര്ജി. ഇക്കാര്യം ചൂണ്ടിക്കാട്ടി സോണിയ ഗാന്ധിയുള്പ്പെടെ പത്ത് പ്രതിപക്ഷ നേതാക്കള്ക്ക് മമത കത്തയച്ചു. ബിജെപി ഇതര പാര്ട്ടികള് ഭരണഘടനാപരമായ അവകാശങ്ങളും സ്വാതന്ത്രങ്ങളും ഉപയോഗിക്കരുതെന്നാണ് ബിജെപി ആഗ്രഹിക്കുന്നത്. സംസ്ഥാന സര്ക്കാരുകളുടെ അധികാരം പരിമിതപ്പെടുത്തി ഇന്ത്യയില് സ്വേച്ഛാധിപത്യഭരണം കൊണ്ടുവരാനാണ് ബിജെപി ശ്രമിക്കുന്നതെന്നും മമത പറഞ്ഞു.
ജനാധിപത്യത്തിനും ഭരണഘനയ്ക്കുമെതിരായ ബിജെപിയുടെ ആക്രമണങ്ങള്ക്കെതിരെ ഐക്യത്തോടെ പ്രവര്ത്തിക്കേണ്ട സമയമായി എന്ന് താന് ശക്തമായി വിശ്വസിക്കുന്നു. തൃണമൂല് കോണ്ഗ്രസ് ചെയര്പേഴ്സണ് എന്ന നിലയില് ബിജെപിക്കെതിരായ യുദ്ധത്തില് സമാന ചിന്താഗതിക്കാരായ എല്ലാ പ്രതിപക്ഷ പാര്ട്ടികള്ക്കുമൊപ്പം പൂര്ണ ഹൃദയത്തോടെ പ്രവര്ത്തിക്കാന് താന് തയാറാണെന്നും മമത കത്തില് പറഞ്ഞു.
സോണിയഗാന്ധിയെക്കൂടാതെ എന്സിപി നേതാവ് ശരത് പവാര്, ഡിഎംകെ നേതാവ് എംകെ സ്റ്റാലിന്, ശിവസേന മേധാവി ഉദ്ദവ് താക്കറെ, വൈഎസ്ആര് കോണ്ഗ്രസ് നേതാവ് ജഗന് മോഹന് റെഡ്ഡി, നവീന് പട്നായിക്, തെലങ്കാന രാഷ്ട്ര സമിതി നേതാവ് കെ ചന്ദ്രശേഖര് റാവു, സമാജ് വാദി പാര്ട്ടി നേതാവ് അഖിലേഷ് യാദവ്, രാഷ്ട്രീയ ജനതാദള് മേധാവി തേജസ്വി യാദവ്, ആംആദ്മി പാര്ട്ടി നേതാവ് അരവിന്ദ് കെജ് രിവാള് എന്നിവര്ക്കാണ് മമത കത്തയച്ചത്. ഇടതു കക്ഷികള്ക്ക് കത്തയച്ചിട്ടില്ല എന്നതും ശ്രദ്ധേയമാണ്.