കുപ്രസിദ്ധമായ ചാരക്കഥയിലെ ഇര നമ്പി നാരായണന്റെ കഥ പറയുന്ന ആര്‍ മാധവന്റെ റോക്കട്രി - ദി നമ്പി ഇഫക്റ്റില്‍ അതിഥി വേഷവുമായി ഷാറൂഖ് ഖാന്‍. ഐ എസ് ആര്‍ ഒ ശാസ്ത്രജ്ഞനായിരുന്ന നമ്പി നാരായണന്റെ ജീവിതത്തെ ആസ്പദമാക്കി ഒരുക്കുന്ന ചിത്രത്തില്‍ ഷാറൂഖ് ഖാന്‍ മാധ്യമപ്രവര്‍ത്തകനായാണെത്തുക. നമ്പി നാരായണനുമായി അഭിമുഖം നടത്തുന്ന അവതാരകന്റെ വേഷമാണ് ഷാറൂഖ് ഖാന്റേത്. മാധവന്‍ തന്നെയാണ് ചിത്രത്തിലെ പ്രധാന കഥാപാത്രമായ നമ്പി നാരായണനായി വേഷമിടുന്നത്. മാധവന്‍ ആദ്യമായി സംവിധാനം ചെയ്യുന്ന ചിത്രമെന്ന പ്രത്യേകത കൂടിയുണ്ട് റോക്കട്രി എന്ന ചിത്രത്തിന്.
മലയാളത്തിന് പുറമേ തമിഴ്, ഹിന്ദി, ഇംഗ്ലീഷ്, തെലുങ്ക്, കന്നട, അറബിക്, ഫ്രഞ്ച്, സ്പാനിഷ്, ജര്‍മ്മന്‍, റഷ്യന്‍, ജാപ്പനീസ് തുടങ്ങിയ ഭാഷകളിലാണ് ചിത്രം റിലീസിനൊരുങ്ങുന്നത്. നമ്പി നാരായണന്റെ 27 വയസുമുതല്‍ 70 വയസുവരെയുളള ജീവിതം അവതരിപ്പിക്കുന്നതിനായി മാധവന്‍ നടത്തിയ മേക്ക് ഓവറുകള്‍ സമൂഹമാധ്യമങ്ങളില്‍ വലിയ ചര്‍ച്ചയായിരുന്നു.
1994 നവംബര്‍ 30-നാണ് നമ്പി നാരായണനെ ചാരവൃത്തി ആരോപിച്ച് ജയിലിലടച്ചത്. പിന്നീട് നിരപരാധിയാണെന്ന് തെളിഞ്ഞതിനെത്തുടര്‍ന്ന് അദ്ദേഹത്തെ കുറ്റവിമുക്തനാക്കുകയായിരുന്നു. 2018-ല്‍ സുപ്രീംകോടതി നമ്പി നാരായണന് അമ്പത് ലക്ഷം രൂപ നഷ്ടപരിഹാരം നല്‍കാന്‍ ഉത്തരവിട്ടു. രാജ്യം പത്മഭൂഷന്‍ നല്‍കി ആദരിച്ച വ്യക്തികൂടിയാണ് നമ്പി നാരായണന്.
