കൊല്ക്കത്ത: ബിജെപി പോളിംഗ് ബൂത്തുകള് പിടിച്ചെടുത്തുവെന്നും, തൃണമൂല് പ്രവര്ത്തകരെ ആക്രമിച്ചുവെന്നും പശ്ചിമബംഗാള് മുഖ്യമന്ത്രി മമതാ ബാനര്ജി. അലിപുര്ദൂര് ജില്ലയില് നടന്ന റാലിയില് സംസാരിക്കുകയായിരുന്നു അവര്. സംസ്ഥാനത്തുളള തൃണമൂല് കോണ്ഗ്രസിന്റെ സ്ഥാനാര്ത്ഥികള്ക്കുനേരേ ബിജെപി അക്രമം അഴിച്ചുവിടുകയാണ്. കഴിഞ്ഞ ദിവസം മാത്രം നൂറിലധികം പരാതികള് ലഭിച്ചിട്ടുണ്ട്. എന്നാല് ബിജെപിയുടെ ഇത്തരം ഹീനമായ തന്ത്രങ്ങള് ഭയപ്പെടുത്തില്ലെന്നും മമത പറഞ്ഞു.
അരംബാഗില് തൃണമൂല് സ്ഥാനാര്ത്ഥി സുജാത മൊണ്ടാലിനെ ആക്രമിച്ച സംഭവത്തെയും മമത അപലപിച്ചു. സുജാത ബൂത്ത് സന്ദര്ശിച്ചപ്പോള് ബിജെപി പ്രവര്ത്തകര് അവരെ ആക്രമിക്കുകയായിരുന്നു. അവര്ക്ക് ഗുരുതകമായി പരിക്കേറ്റിട്ടുണ്ട്. ബിജെപി ബേട്ടി ബച്ചാവോ എന്ന് പ്രസംഗിക്കുന്നു. എന്നിട്ട് ഞങ്ങളുടെ സ്ത്രീ സ്ഥാനാര്ത്ഥിയെ മര്ദ്ദിക്കുകയാണെന്നും മമത പറഞ്ഞു.
പശ്ചിമബംഗാളില് എട്ട് ഘട്ടങ്ങളിലായാണ് നിയമസഭാ തെരഞ്ഞെടുപ്പ് നടക്കുന്നത്. മാര്ച്ച് 27-നാണ് ആദ്യഘട്ട തെരഞ്ഞെടുപ്പ് നടന്നത്. മമതാ ബാനര്ജി മത്സരിക്കുന്ന നന്ദിഗ്രാമില് രണ്ടാം ഘട്ടത്തിലാണ് തെരഞ്ഞെടുപ്പ് നടന്നത്. മമതാ ബാനര്ജിയും ബിജെപിയുടെ സുവേന്ദു അധികാരിയും ഏറ്റുമുട്ടിയ നന്ദിഗ്രാം മണ്ഡലം കടുത്ത പോരാട്ടത്തിനാണ് സാക്ഷ്യം വഹിച്ചത്.