കൊല്ക്കത്ത: ഹിന്ദു-മുസ്ലിം വോട്ടുകളെക്കുറിച്ച് എന്നും സംസാരിക്കുന്ന പ്രധാനമന്ത്രി നരേന്ദ്ര മോദിക്കെതിരെ ഒരു പരാതിയുമില്ലെന്ന് പശ്ചിമ ബംഗാള് മുഖ്യമന്ത്രിയും, തൃണമൂല് കോണ്ഗ്രസ് നേതാവുമായ മമത ബാനര്ജി. മതത്തിന്റെ പേരില് വോട്ടുകള് ഭിന്നിപ്പിക്കുന്നതിനെതിരെ താന് ഇനിയും ശബ്ദമുയര്ത്തുമെന്നും മമത ബാനര്ജി വ്യക്തമാക്കി.
പെരുമാറ്റ ചട്ടലഘനം നടത്തിയെന്നാരോപിച്ച് തെരഞ്ഞെടുപ്പ് കമ്മീഷന് മമത ബാനര്ജിക്ക് കാരണം കാണിക്കല് നോട്ടീസ് അയച്ചിരുന്നു. ഇതിനെക്കുറിച്ച് പ്രതികരിക്കുകയായിരുന്നു മമത. ഒന്നല്ല പത്ത് കാരണം കാണിക്കല് നോട്ടീസ് അയച്ചാലും താന് വോട്ട് ബാങ്ക് രാഷ്ട്രീയത്തിനെതിരെ സംസാരിക്കും, നന്ദിഗ്രാം പ്രചാരണ സമയത്ത് മിനി പാകിസ്ഥാന് എന്ന് വിളിച്ചവര്ക്കെതിരെ എത്ര പരാതികള് ലഭിച്ചിട്ടുണ്ടെന്നും മമത ബാനര്ജി ചോദിച്ചു.
ഏപ്രില് 3 ന് നടത്തിയ പ്രസ്താവനയിലാണ് തെരഞ്ഞെടുപ്പ് കമ്മീഷന് കാരണം കാണിക്കല് നോട്ടീസ് അയച്ചത്. ബിജെപിക്കെതിരെ മുസ്ലിം വോട്ടര്മാര് ഒരുമിച്ച് നില്ക്കണം എന്നായിരുന്നു മമത ബാനര്ജിയുടെ പ്രസ്താവന.