തിരുവനന്തപുരം: സംസ്ഥാനത്ത് കൊവിഡ്‌ വാക്സിന് ക്ഷാമം നേരിടുന്നില്ല. ഇത്തരത്തില്‍ നടക്കുന്ന പ്രചാരണങ്ങളെ ആരോഗ്യ വകുപ്പ് തള്ളി. വരുന്ന അഴ്ച്ചകളില്‍ പരമാവധി ആളുകള്‍ക്ക് വാക്സിന് നല്കാനുള്ള ശ്രമത്തിലാണ് ആരോഗ്യ വകുപ്പെന്ന് അധികൃതര്‍ അറിയിച്ചു. കൊവിഡ്‌ അതിവേഗം വ്യാപിക്കുന്ന സാഹചര്യത്തിലാണ് ആരോഗ്യ വകുപ്പിന്‍റെ അറിയിപ്പ്.
കൊവിഡ്‌ വാക്സിന് സ്വീകരിച്ചിട്ടും മുഖ്യമന്ത്രിക്ക് കൊവിഡ്‌ സ്ഥിരീകരിച്ചതിനാല്‍ ജനങ്ങള്‍ ആശങ്കപ്പെടേണ്ടതില്ല. വാസ്കിന്‍ സ്വീകരിച്ചാല്‍ രോഗം വരാതിരിക്കും എന്നല്ല, മറിച്ച് രോഗം മൂര്‍ഛിക്കുന്നത് കുറയും. ആദ്യഡോസ് എടുത്താല്‍ 30 ശതമാനം വരെ രോഗ പ്രതിരോധവും രണ്ടാമത്തെ ഡോസ് സ്വീകരിച്ചാല്‍ 80 ശതമാനം വരെ പ്രതിരോധവുമാണ് ലഭിക്കുകയെന്നും ആരോഗ്യ വകുപ്പ് അറിയിച്ചു.
മറ്റ് സംസ്ഥാനങ്ങളിലെ പോലെ കേരളത്തില്‍ വാക്സിന് ക്ഷാമമില്ല. നിലവില്‍ ആവശ്യത്തിന് വാക്സിന് സംസ്ഥാനത്തുണ്ട്. ഏപ്രില്‍ 20-ന് അടുത്ത ബാച്ച് വാക്സിന് കൂടെ കേരളത്തിലെത്തും. അതോടുകൂടി കുറേയധികം ആളുകള്‍ക്ക് വാക്സിന് നല്കാന്‍ സാധിക്കും. കഴിഞ്ഞ തവണ 13 ലക്ഷം വാക്സിന് ഡോസുകളാണ് സംസ്ഥാനത്തിന് ലഭിച്ചത്.
