മഞ്ജു വാര്യരും സണ്ണി വെയ്നും കേന്ദ്രകഥാപാത്രങ്ങളെ അവതരിപ്പിക്കുന്ന ചതുര്മുഖം തിയറ്ററുകളില് നിന്ന് പിന്വലിച്ചു. സംസ്ഥാനത്ത് കൊവിഡ് വ്യാപനം രൂക്ഷമാവുന്ന സാഹചര്യത്തിലാണ് ഈ നീക്കം. മഞ്ജു വാര്യര് തന്നെയാണ് വിവരം ആരാധകരുമായി പങ്കുവയ്ച്ചത്.
മഞ്ജുവിന്റെ പോസ്റ്റിന്റെ പൂര്ണരൂപം
പ്രിയപ്പെട്ടവരേ,
ചതുര്മുഖം റിലീസ് ആയ അന്ന് മുതല് നിങ്ങള് തന്ന സ്നേഹത്തിന് നന്ദി. ഞങ്ങളുടെ പ്രതീക്ഷകള്ക്കും മുകളിലായിരുന്നു കുടുംബ പ്രേക്ഷകരില് നിന്നും ലഭിച്ച സ്വീകരണം. റിലീസ് ചെയ്ത ഭൂരിഭാഗം തിയറ്ററുകളിലും ചതുര്മുഖം നിറഞ്ഞ സദസ്സില് പ്രദര്ശിപ്പിച്ചു കൊണ്ടിരിക്കെയാണ് നമ്മുടെ നാട്ടില് കോവിഡിനെതിരെയുള്ള ജാഗ്രത ശക്തമാക്കേണ്ട ആവശ്യം ഉണ്ടായിരിക്കുന്നത്. അതു കൊണ്ട് കുറച്ച് വിഷമത്തോടെയാണെങ്കിലും ചതുര്മുഖം കേരളത്തിലെ തിയറ്ററുകളില്നിന്ന് താല്ക്കാലികമായി പിന്വലിക്കാന് ഞങ്ങള്
നിര്ബന്ധിതരായിരിക്കുകയാണ്. രോഗവ്യാപനം നിയന്ത്രണവിധേയവും പൊതുഇടങ്ങള് സുരക്ഷിതവുമാവുന്ന സാഹചര്യത്തില് ചതുര്മുഖം നിങ്ങളിലേക്ക് തിരിച്ചു കൊണ്ടു വരുന്നതായിരിക്കും. സര്ക്കാര് നിഷ്ക്കര്ഷിച്ചിരിക്കുന്ന മാനദണ്ഡങ്ങള് പാലിക്കുക, സുരക്ഷിതരായിരിക്കുക.
സ്നേഹത്തോടെ
നിങ്ങളുടെ സ്വന്തം
മഞ്ജുവാര്യര്
നവാഗതരായ രഞ്ജിത്ത് കമല ശങ്കര്, സലില് വി എന്നിവര് ചേര്ന്നാണ് ചിത്രത്തിന്റെ സംവിധാനം നിര്വഹിച്ചിരിക്കുന്നത്. ജിസ്സ് ടോം മൂവീസിന്റെ ബാനറില് മഞ്ജു വാര്യര് പ്രൊഡക്ഷന്സും ജിസ്സ് ടോംസും ജസ്റ്റിന് തോമസ്സും ചേര്ന്നാണ് ചിത്രം നിര്മ്മിച്ചിരിക്കുന്നത്. ഏപ്രില് എട്ടിനായിരുന്നു ചതുര്മുഖം റിലീസ് ചെയ്തത്.