ഇസ്ലാമാബാദ്: കൊവിഡിനെ നേരിടാന്‍ ഇന്ത്യക്ക് സഹായഹസ്തവുമായി പാക്കിസ്ഥാനിലെ മനുഷ്യാവകാശ സംഘടനയായ ഈദി ഫൗണ്ടേഷന്‍. ഇന്ത്യയുടെ കൊവിഡിനെതിരായ പ്രതിരോധപ്രവര്‍ത്തനങ്ങളില്‍ പങ്കുചേരാന്‍ ഒരു സംഘം സന്നദ്ധ പ്രവര്‍ത്തകര്‍ക്കും അന്‍പത് ആംബുലന്‍സുകള്‍ക്കും ഇന്ത്യയിലേക്ക് പ്രവേശനാനുമതി തേടി ഈദി ഫൗണ്ടേഷന്‍ ചെയര്‍മാന്‍ ഫൈസല്‍ പ്രധാനമന്ത്രി നരേന്ദ്രമോദിക്ക് കത്തെഴുതിയിട്ടുണ്ട്.
'നിങ്ങളുടെ രാജ്യത്ത് മഹാമാരി ഉണ്ടാക്കിയ അസാധാരണമായ ആഘാധത്തില്‍ വളരെയധികം ആളുകള്‍ ദുരിതം അനുഭവിക്കുന്നതായി അറിഞ്ഞതില്‍ വളരെ ദുഖമുണ്ട്. നിലവിലെ സാഹചര്യങ്ങള്‍ നേരിടാനായി 50 ആംബുലന്‍സുകളുമായി സേവനമനുഷ്ടിക്കാന്‍ ഞങ്ങള്‍ തയാറാണ്. അടിയന്തര മെഡിക്കല്‍ സംഘവുമായി ഇന്ത്യയില്‍ പ്രവേശിക്കുന്നതിന് ഇന്ത്യന്‍ സര്‍ക്കാരിന്റെ അനുമതി മാത്രമാണ് ആവശ്യമെന്നും' ഫൈസല്‍ കത്തില്‍ പറഞ്ഞു.
ഇന്ത്യയിലെ ജനങ്ങളെ സഹായിക്കാനായി എല്ലാ സേവനങ്ങളും ഞങ്ങളൊരുക്കാം. വാഹനത്തിനാവശ്യമായ ഇന്ധനം, ഭക്ഷണം, സംഘത്തിനാവശ്യമായ വസ്തുക്കള്‍ എന്നിവയല്ലാതെ മറ്റൊന്നും അധികമായി ആവശ്യപ്പെടുന്നില്ലെന്നും ഫൈസല്‍ വ്യക്തമാക്കി. നേരത്തെ ഇന്ത്യയിലെ ജനങ്ങള്‍ക്ക് ഓക്‌സിജന്‍ നല്‍കണമെന്ന് പാക് പ്രധാനമന്ത്രിയോടാവശ്യപ്പെട്ട് പാക്കിസ്ഥാനിലെ ഒരു കൂട്ടം പേര്‍ രംഗത്തെത്തിയിരുന്നു. #IndiaNeedOxygen എന്ന ഹാഷ്ടാഗ് പാക്കിസ്ഥാനില്‍ ട്രെന്‍ഡിംഗാണ്.
