പ്രധാനമന്ത്രി നരേന്ദ്രമോദി രാജിവയ്ക്കണമെന്നാവശ്യപ്പെട്ടുള്ള #ResignModi എന്ന ക്യാംപയ്ന് വിലക്കേര്‍പ്പെടുത്തി ഫേസ്ബുക്ക്. സംഭവം വിവാദമായതോടെ 'അറിയാതെ സംഭവിച്ചതാണെന്ന' വിശദീകരണവുമായി ഫേസ്ബുക്ക് രംഗത്തെത്തി.
കൊവിഡ് രണ്ടാം തരംഗം രാജ്യത്ത് പൊതുജനാരോഗ്യ ദുരന്തമായി മാറിയതില്‍ ബിജെപി സര്‍ക്കാരിനെയും നരേന്ദ്ര മോദിയെയും വിമര്‍ശിച്ച് സോഷ്യല്‍ മീഡിയയില്‍ വ്യാപകമായി പോസ്റ്റുകള്‍ പ്രചരിച്ചിരുന്നു. 'ഹാഷ്ടാഗ് അബദ്ധവശാലാണ് ബ്ലോക്ക് ചെയ്യപ്പെട്ടത്. അല്ലാതെ ഇന്ത്യന്‍ സര്‍ക്കാര്‍ ആവശ്യപ്പെട്ടതു കൊണ്ടല്ല. അതിനാല്‍ തന്നെ അത് പുനഃസ്ഥാപിച്ചിട്ടുണ്ട്' എന്ന് ഫെയ്‌സ്ബുക്ക് കമ്പനി വക്താവ് അറിയിച്ചു.
കഴിഞ്ഞ ദിവസം കേന്ദ്ര സര്‍ക്കാരിനെ വിമര്‍ശിച്ചുകൊണ്ടുള്ള ട്വീറ്റുകളും നീക്കം ചെയ്തിരുന്നു. കേന്ദ്ര സര്‍ക്കാര്‍ നേരിട്ടാവശ്യപ്പെട്ടതിനെ തുടര്‍ന്നായിരുന്നു ട്വിറ്ററിന്റെ ഈ നീക്കം. കേന്ദ്രത്തില്‍ ബിജെപി അധികാരമേറ്റതിന് ശേഷം സാമൂഹ്യമാധ്യമങ്ങളില്‍ സ്വതന്ത്രാഭിപ്രായത്തിന്റെ വാ മൂടിക്കെട്ടാന്‍ നിരവധിയായ ശ്രമങ്ങള്‍ നടക്കുന്നു എന്ന് പരക്കെ വിമര്‍ശനമുയരുന്നുണ്ട്.
