ഡല്ഹി: ഓക്സിജന് ലഭിക്കാതെയുളള കൊവിഡ് രോഗികളുടെ മരണം കൂട്ടക്കൊലയ്ക്ക് തുല്യമാണെന്ന് അലഹബാദ് ഹൈക്കോടതി. ഓക്സിജന് ക്ഷാമം മൂലം ജനങ്ങള് മരിക്കുന്നതുമായി ബന്ധപ്പെട്ട പൊതുതാല്പ്പര്യഹര്ജി പരിഗണിക്കുകയായിരുന്നു കോടതി. നമ്മുടെ ആരോഗ്യരംഗം വളരെ മെച്ചപ്പെട്ടതാണ്. ഹൃദയവും തലച്ചോറും മാറ്റിവെയ്ക്കുന്ന രാജ്യത്താണ് ജനങ്ങള് ഓക്സിജന് ലഭിക്കാതെ മരിക്കുന്നത്. ഓക്സിജന് സിലിണ്ടറുകള്ക്കായി ജനങ്ങള് അലയുന്ന കാഴ്ച്ചകളാണ് സമൂഹമാധ്യമങ്ങളില് കാണാന് കഴിയുന്നതെന്നും കോടതി പറഞ്ഞു.
ഓക്സിജന് സംഭരണവും വിതരണവും ഉറപ്പുവരുത്തേണ്ട ഉത്തരവാദിത്വമുളളവര് ആശുപത്രികളില് ഓക്സിജന് വിതരണം ചെയ്യാതിരിക്കുന്നതുമൂലം കൊവിഡ് രോഗികള് മരണപ്പെടുന്നത് ക്രിമിനല് നടപടിയാണെന്നും ജസ്റ്റിസുമാരായ സിദ്ധാര്ത്ഥ് വര്മ്മ, അജിത് കുമാര് എന്നിവരടങ്ങിയ ബെഞ്ച് അഭിപ്രായപ്പെട്ടു.
ഓക്സിജന് ക്ഷാമം മൂലമുളള മരണങ്ങളുമായി ബന്ധപ്പെട്ട് കൂടുതല് വിവരങ്ങള് ശേഖരിക്കാന് ലക്നൗ, മീററ്റ് ജില്ലാ മജിസ്ട്രേറ്റുമാര്ക്ക് കോടതി നിര്ദേശം നല്കി. അതേസമയം കഴിഞ്ഞ ഇരുപത്തിനാല് മണിക്കൂറിനിടെ 3,82,315 പേര്ക്കാണ് രാജ്യത്ത് കൊവിഡ് സ്ഥിരീകരിച്ചത്. മഹാരാഷ്ട്ര, കര്ണാടക, ഉത്തര്പ്രദേശ്, ഗുജറാത്ത്, കേരളം തുടങ്ങിയ സംസ്ഥാനങ്ങളിലാണ് ഏറ്റവും കൂടുതല് രോഗികളുളളത്.