ഡല്‍ഹി: ലോകത്ത് പുതിയതായി റിപ്പോര്ട്ട് ചെയ്യുന്ന കൊവിഡ്‌ രോഗികളില്‍ 46 ശതമാനവും ഇന്ത്യയില്‍ നിന്നാണെന്ന് ലോകാരോഗ്യ സംഘടന. 25 ശതമാനത്തില്‍ അധികം മരണ നിരക്കും ഇന്ത്യയിലാണ് റിപ്പോര്ട്ട് ചെയ്യപ്പെട്ടത്. കഴിഞ്ഞ ഒരാഴ്ച്ചത്തെ കണക്കിന്‍റെ അടിസ്ഥാനത്തിലാണ് ലോകാരോഗ്യ സംഘടന റിപ്പോര്ട്ട് പുറത്ത് വിട്ടിരിക്കുന്നത്.
ലോകത്ത് കഴിഞ്ഞ ഒരാഴ്ച്ച മാത്രം 57 ലക്ഷം പുതിയ കൊവിഡ്‌ കേസുകള്‍ റിപ്പോര്ട്ട് ചെയ്തു. 93,000 പേര്‍ മരണപ്പെട്ടു. ഇതില്‍ 26 ലക്ഷത്തില്‍ അധികം കേസുകളും റിപ്പോര്ട്ട് ചെയ്യപ്പെടുന്നത് ഇന്ത്യയിലാണ്. ഇന്നലെ മാത്രം രാജ്യത്ത് 3,82,315 പേര്‍ക്ക് രോഗം ബാധിക്കുകയും, 3780 പേര്‍ മരണപ്പെടുകയും ചെയ്തു.
അതിനിടെ, രാജ്യത്ത് കൊവിഡിന്‍റെ മൂന്നാം തരംഗം നേരിടാന്‍ സംസ്ഥാനങ്ങള്‍ തയാറാകണമെന്ന് കേന്ദ്ര സര്‍ക്കാര്‍ നിര്‍ദേശിച്ചു. വൈറസിന്റെ പുതിയ വകഭേദം കൂടുതല്‍ പകരാന്‍ സാധ്യതയുണ്ടെന്നാണ് ആരോഗ്യ മന്ത്രാലയത്തിന്റെ മുന്നറിയിപ്പ്. കേരളം കൂടാതെ മഹാരാഷ്ട്ര, കര്‍ണാടക, ഉത്തര്‍പ്രദേശ് എന്നീ സംസ്ഥാനങ്ങളാണ് പ്രതിദിന കേസില്‍ മുന്നിട്ടുനില്‍ക്കുന്നത്. മഹാരാഷ്ട്രയില്‍ 57, 640 പേര്‍ക്ക് രോഗം സ്ഥിരീകരിച്ചു. 920 പേര്‍ മരിച്ചു.സംസ്ഥാനത്തെ ഏറ്റവും ഉയര്‍ന്ന പ്രതിദിന മരണസംഖ്യയാണിത്. നാസിക്കില്‍ മാത്രം നൂറിലധികം മരണം റിപ്പോര്ട്ട് ചെയ്തിട്ടുണ്ട്.
