നിയമസഭാ തെരഞ്ഞെടുപ്പുകളിലുണ്ടായ തോൽവി അപ്രതീക്ഷിതവും നിരാശാജനകവുമാണെന്ന് കോൺഗ്രസ് പ്രസിഡന്റ് സോണിയാ ഗാന്ധി. കോൺഗ്രസ് പാർലമെന്ററി പാർട്ടിയോഗത്തിലാണ് തെരഞ്ഞെടുപ്പ് ഫലം സംബന്ധിച്ച് സോണിയാ അഭിപ്രായം പ്രകടനം നടത്തിയത്. ഫലം വിലയിരുത്താൻ കോൺഗ്രസ് വർക്കിംഗ് കമ്മിറ്റി ഉടൻ ചേരുമെന്നും അവർ പറഞ്ഞു. പരാജയം സംബന്ധിച്ച് സത്യസന്ധമായ ആത്മപരിശോധന നടത്തുമെന്നും സോണിയ വ്യക്തമാക്കി.
തെരഞ്ഞെടുപ്പിൽ ജയിച്ച തൃണമുൽ കോൺഗ്രസ് നേതാവ് മമത ബാനർജി, ഡിഎംകെ നേതാവ്എം കെ സ്റ്റാലിൻ, കേരളത്തിലെ ഇടതുപക്ഷം എന്നിവരെ സോണിയ അഭിനന്ദിച്ചു. തെരഞ്ഞെടുപ്പ് തിരിച്ചടിയെ കുറിച്ച് സത്യസന്ധമായും വിനയത്തോടെയും വിലയിരുത്തുമെന്നും സോണിയ പറഞ്ഞു.
ബംഗാളിൽ ടിഎംസിക്കെതിരെ ഇടതുപക്ഷത്തോടൊപ്പം ചേർന്ന് മത്സരിച്ച കോൺഗ്രസിന് സീറ്റ് നേടാനായില്ല. കേരളത്തിൽ എൽഡിഎഫിനെതിരെയും അസമിൽ ബിജെപിക്കെതിരെയും കോൺഗ്രസ് പരാജയം ഏറ്റുവാങ്ങി. പുതുച്ചേരിയിൽ എൻഡിഎയോട് കോൺഗ്രസ് പരാജയപ്പെടുകയായിരുന്നു.
