തിരുവനന്തപുരം: തനിക്ക് ലഭിച്ചിരിക്കുന്നത് പുഷ്പകിരീടമല്ലന്ന് വ്യക്തമായി അറിയാമെന്ന് നിയുക്ത പ്രതിപക്ഷ നേതാവ് വി. ഡി സതീശന്‍. എല്ലാ വെല്ലുവിളികളെയും അതിജീവിച്ച് കോണ്‍ഗ്രസിനെയും, യുഡിഎഫിനെയും തിരിച്ച് കൊണ്ട് വരുവാന്‍ ശ്രമിക്കുമെന്നും പ്രതിപക്ഷ നേതാവ് വ്യക്തമാക്കി. എല്ലാവരുടെയും പിന്തുണയുണ്ടെങ്കില്‍ മാത്രമേ മികച്ച പ്രകടനം കാഴ്ചവെക്കാന്‍ സാധിക്കുകയുള്ളുവെന്നും വി. ഡി സതീശന്‍ പറഞ്ഞു.
യുഡിഎഫ് രാഷ്ട്രീയ പ്രതിസന്ധി നിറഞ്ഞ കാലത്ത് കൂടിയാണ് പോകുന്നത്. ഈ സമയം തന്നെ പ്രതിപക്ഷ നേതാവായി തെരഞ്ഞെടുത്തതില്‍ ഹൈക്കമാന്‍ഡിനോടും, കേരളത്തിലെ മുതിര്‍ന്ന നേതാക്കളോടും കടപ്പെട്ടിരിക്കുന്നു. കെ. കരുണാകരന്‍, എ.കെ ആന്‍റണി, ഉമ്മന്‍‌ചാണ്ടി, രമേശ്‌ ചെന്നിത്തല എന്നിങ്ങനെയുള്ള മഹാരഥന്മാരിരുന്ന കസേരയിലേക്കാണ് താന്‍ തെരഞ്ഞെടുക്കപ്പെട്ടിരിക്കുന്നത്. സ്ഥാനലബ്ധി തന്നെ വിസ്മയിപ്പിക്കുന്നുവെന്നും ആദ്യ വാര്‍ത്താ സമ്മേളനത്തില്‍ വി. ഡി സതീശന്‍ പറഞ്ഞു.
കൊവിഡ്‌ പ്രതിരോധ പ്രവര്‍ത്തനത്തിന് എല്ലാവിധ പിന്തുണയും പ്രതിപക്ഷം നല്‍കുന്നു. ക്രിയാത്മ പ്രവര്‍ത്തനവും, ക്രിയാത്മ വിമര്‍ശനവും ഉന്നയിക്കുന്ന പ്രതിപക്ഷത്തെയാണ് ഇനി കേരളത്തിന് കാണാന്‍ സാധിക്കുകയെന്നും വി. ഡി സതീശന്‍ വ്യക്തമാക്കി. സര്‍ക്കാരിനെ എതിര്‍ക്കേണ്ടിടത്ത് എതിര്‍ക്കുക തന്നെ ചെയ്യും. അതിന് വേണ്ടി നിയമസഭക്ക് അകത്തും പുറത്തുമുള്ള എല്ലാ അവസരങ്ങളും പ്രതിപക്ഷം ഉപയോഗപ്പെടുത്തുമെന്നും അദ്ദേഹം കൂട്ടിച്ചേര്‍ത്തു.
