ഓസ്‌ട്രേലിയന്‍ ഓള്‍റൗണ്ടര്‍ ഗ്ലെന്‍ മാക്സ്വെല്ലിന്റെ ഇന്ത്യന്‍ ആചാരമനുസരിച്ചുള്ള വിവാഹ നിശ്ചയം ഇന്‍സ്റ്റഗ്രാം അടക്കമുള്ള സമൂഹ മാധ്യമങ്ങളില്‍ വൈറലാണ്. ഇന്ത്യൻ വംശജയായ വിനി രാമനാണ് വധു. വിനി തന്നെയാണ് ഇന്‍സ്റ്റഗ്രാമിലൂടെ ചിത്രങ്ങള്‍ ആദ്യം പങ്കുവെച്ചത്. മെല്‍ബണില്‍ നടന്ന ചടങ്ങില്‍ വിനിക്കൊപ്പം പരമ്പരാഗത ഇന്ത്യന്‍ വേഷത്തിലാണ് മാക്‌സ്‌വെല്ലും പങ്കെടുത്തത്. തമിഴ്‌നാട്ടില്‍ വേരുകളുള്ള വിനി ഓസ്‌ട്രേലിയയിലാണ് ജനിച്ചതും വളര്‍ന്നതും.
വിവാഹിതരാകാന്‍ പോകുന്ന കാര്യം മാക്‌സ്‌വെല്‍ തന്നെയാണ് ആദ്യം പുറത്തു വിട്ടത്. 2017-മുതല്‍ ഇരുവരും പ്രണയത്തിലായിരുന്നു. ബിഗ് ബാഷ് ലീഗില്‍ മാക്സ്വെല്ലിന്റെ ടീമായ മെല്‍ബണ്‍ സ്റ്റാര്‍സിന്റെ ഒരു പരിപാടിക്കിടെയാണ് ഇരുവരും ആദ്യം കണ്ടു മുട്ടുന്നത്. ഓസ്‌ട്രേലിയയില്‍ ഫാര്‍മസിസ്റ്റായി ജോലി നോക്കുകയാണ് വിനി. ഒരാഴ്ച്ച മുമ്പാണ് മാക്സി തന്നോട് വിവാഹാഭ്യർത്ഥന നടത്തിയതെന്നും താനതിനോട് സമ്മതം മൂളിയെന്നും വിനി ഇൻസ്റ്റഗ്രാമിലൂടെ പറഞ്ഞു. ഐ.പി.എല്ലില്‍ കിംഗ്സ് ഇലവന്‍ പഞ്ചാബിനു വേണ്ടിയാണ് മാക്‌സ്‌വെല്‍ കളിക്കുന്നത്.
