കൊച്ചി: ജയസൂര്യയെ നായകനാക്കി ശ്രീ ഗോകുലം മൂവിസ് നിര്മ്മിക്കുന്ന കത്തനാര് സിനിമയുടെ ചിത്രീകരണത്തിനായി ഇന്ത്യയിലെ ഏറ്റവും വലിയ മോഡുലാര് ഷൂട്ടിംഗ്ഫ്ലോര് ഒരുങ്ങുന്നു. ഇന്ത്യയില് ആദ്യമായി വെര്ച്വല് പ്രൊഡക്ഷന് സാങ്കേതിക വിദ്യയില് ഒരുങ്ങുന്ന ചിത്രത്തിന് വേണ്ടി എറണാകുളത്ത് 36 ഏക്കറില് മോഡുലാര് ഷൂട്ടിംഗ്ഫ്ലോര് അണിയറപ്രവര്ത്തകര് നിര്മ്മിക്കാന് ഒരുങ്ങുന്നുവെന്നാണ് മാധ്യമങ്ങള് റിപ്പോര്ട്ട് ചെയ്യുന്നത്. ബിഗ് ബജറ്റ് ചിത്രമായ കത്തനാര് പ്രേക്ഷകര്ക്ക് പുതിയൊരു ദൃശ്യാനുഭവമാണ് സമ്മാനിക്കുകയെന്നാണ് സിനിമയുടെ അണിയറപ്രവര്ത്തകര് അവകാശപ്പെടുന്നത്.
മുസിരിസ് പോസ്റ്റിനെ ടെലഗ്രാം, വാട്സാപ്പ് എന്നിവയിലൂടേയും ഫോളോ ചെയ്യാം. വീഡിയോ സ്റ്റോറികള്ക്കായി ഞങ്ങളുടെ യൂട്യൂബ് ചാനല് സബ്സ്ക്രൈബ് ചെയ്യുക
ഫാന്റസി അഡ്വെഞ്ചര് വിഭാഗത്തിലൊരുക്കുന്ന സിനിമയുടെ ഷൂട്ടിംഗിന് ARRI ALEXA 35 എന്ന പ്രീമിയം ക്യാമറയാണ് ഉപയോഗിക്കുന്നത്. കൂടാതെ വിദേശ ചിത്രങ്ങളില് കണ്ടുമാത്രം പരിചയമുള്ള നിരവധി സാങ്കേതികവിദ്യകള് സിനിമയിലുണ്ടാകും. മലയാളി പ്രേക്ഷകര് ഇതുവരെ കണ്ടുശീലിച്ച കത്തനാരില് നിന്നും വളരെ വ്യത്യസ്തമായ കഥയും മേക്കിംഗ് രീതിയുമാണ് ചിത്രത്തില് ഉപയോഗിക്കുന്നതെന്നാണ് സിനിമയുമായി ബന്ധപ്പെട്ട വൃത്തങ്ങളില് നിന്നും ലഭിക്കുന്ന വിവരം. ജയസൂര്യയുടെ കരിയറിലെ മികച്ചയൊരു സിനിമയായിരിക്കും കത്തനാരെന്നും അണിയറപ്രവര്ത്തകര് പറയുന്നു.