ഡല്‍ഹി: വാഹനാപകടത്തില്‍ പരിക്കേറ്റ് ചികിത്സയില്‍ കഴിയുന്ന ഋഷഭ് പന്തിന് ആശംസയുമായി ഡല്‍ഹി ക്യാപിറ്റല്‍സ് ക്യാപ്റ്റന്‍ ഡേവിഡ് വാര്‍ണര്‍. ഒരു മത്സരമെങ്കിലും കാണാന്‍ നീ എത്തുമെന്നാണ് പ്രതീക്ഷിക്കുന്നതെന്നും വേഗം സുഖം പ്രാപിക്കട്ടെയെന്നും വാര്‍ണര്‍ പറഞ്ഞു. ടീമിന്റെ ഒഫീഷ്യൽ പേജുകളിൽ ഷെയർ ചെയ്ത വീഡിയോയിലാണ് വാര്‍ണര്‍ പന്തിന് ആശംസ അറിയിച്ചിരിക്കുന്നത്.
'കീരീടം നേടുമെന്ന പ്രതീക്ഷയോടെയാണ് ഇത്തവണ മത്സരത്തിനിറങ്ങുന്നത്. താങ്കള്‍ സുഖം പ്രാപിക്കുന്നതുവരെ ടീമിന്റെ എല്ലാ പിന്തുണയുമുണ്ടായിരിക്കും. ഡല്‍ഹി ക്യാപിറ്റല്‍സിന്‍റെ ഒരു മത്സരമെങ്കിലും കാണാന്‍ പന്ത് എത്തുമെന്നാണ് പ്രതീക്ഷിക്കുന്നത്. ഡൽഹി ക്യാപിറ്റൽസ് കുടുംബത്തിന്റെ പേരിൽ നിങ്ങൾക്ക് എല്ലാ ആശംസകളും നേരുന്നു. വേഗം സുഖം പ്രാപിക്കട്ടെ' - വാര്‍ണര്‍ പറഞ്ഞു.
ഋഷഭ് പന്തിന് പകരമായാണ് ഓസ്‌ട്രേലിയന്‍ താരം ഡേവിഡ് വാര്‍ണര്‍ ഡല്‍ഹി ക്യാപിറ്റല്‍സിനെ നയിക്കുന്നത്. ഇന്ത്യന്‍ ഓള്‍റൗണ്ടര്‍ അക്‌സര്‍ പട്ടേലാണ് വൈസ് ക്യാപ്റ്റന്‍. ഈ മാസം 31 മുതലാണ് ഐപിഎല്‍ മത്സരങ്ങള്‍ ആരംഭിക്കുന്നത്. എന്നാല്‍ ഒക്ടോബര്‍-നവംബര്‍ മാസങ്ങളിലായി ഇന്ത്യയില്‍ നടക്കുന്ന ഏകദിന ലോകകപ്പില്‍ വാര്‍ണര്‍ പങ്കെടുക്കുമോയെന്ന കാര്യത്തില്‍ ഇതുവരെ തീരുമാനമായിട്ടില്ല.
ഡിസംബർ 30-നാണ് ഋഷഭ് പന്തിന് വാഹനാപകടത്തില്‍ പരിക്കേല്‍ക്കുന്നത്. അപകടത്തില്‍ കാല്‍ പാദത്തിനും ഉപ്പൂറ്റിക്കുമാണ് സാരമായ പരിക്ക് സംഭവിച്ചത്. വാഹനം ഓടിക്കുന്നതിനിടയില്‍ ഋഷഭ് പന്ത് ഉറങ്ങി പോയതാണ് അപകടകാരണം. പരുക്കിന്‍റെ ഗൌരവവും തുടര്‍ച്ചയായ ശാസ്ത്രക്രിയകളും കാരണം 6 മാസത്തേക്ക് പന്തിന് കളത്തില്‍ ഇറങ്ങാന്‍ സാധിക്കില്ല. പരുക്ക് ഭേദമായാലും ഫിറ്റ്നസ് വീണ്ടെടുക്കുന്ന കാര്യത്തില്‍ അനിശ്ചിതത്വം തുടരുന്നതിനാല്‍ പന്തിന് ഈ വര്‍ഷത്തെ മുഴുവന്‍ കളികളും നഷ്ടമാകുമെന്ന് ക്രിക്ഇന്‍ഫോയുടെ റിപ്പോര്‍ട്ടില്‍ പറയുന്നത്.
