കൊച്ചി: മുഖ്യമന്ത്രി പിണറായി വിജയന് ക്രിമിനലാണെന്ന് പ്രതിപക്ഷ നേതാവ് വി ഡി സതീശന്‍. മുഖ്യമന്ത്രിയെ അധികാരത്തിന്റെ ധാര്‍ഷ്ട്യം പിടികൂടിയെന്നും കലാപാഹ്വാനം നടത്തിയ അദ്ദേഹം മാപ്പുപറഞ്ഞ് ഇറങ്ങിപ്പോകണമെന്നും വി ഡി സതീശന്‍ പറഞ്ഞു. അക്രമം തുടരണമെന്ന് പറഞ്ഞ മുഖ്യമന്ത്രിയുടെ മനസ് നികൃഷ്ടമാണെന്നും കരിങ്കൊടി കാണിക്കുന്നവരെ കൊല്ലണമെന്നാണ് അദ്ദേഹം പറയുന്നതെന്നും പ്രതിപക്ഷ നേതാവ് കുറ്റപ്പെടുത്തി. എറണാകുളത്ത് നടന്ന വാര്‍ത്താ സമ്മേളനത്തിലായിരുന്നു വി ഡി സതീശന്റെ പ്രതികരണം.
'കണ്ണൂരില്‍ കരിങ്കൊടി കാട്ടിയ കെ എസ് യു- യൂത്ത് കോണ്‍ഗ്രസ് പ്രവര്‍ത്തകരെ സിപിഎം- ഡി വൈ എഫ് ഐ ഗുണ്ടകള്‍ ക്രൂരമായി മര്‍ദ്ദിച്ചത് രക്ഷാപ്രവര്‍ത്തനമാണെന്നും അത് ഇനിയും തുടരണമെന്നുമാണ് മുഖ്യമന്ത്രി പറഞ്ഞത്. കൊല്ലണമെന്ന ഉദ്ദേശത്തോടെ മാരകായുധങ്ങളുമായി യൂത്ത് കോണ്‍ഗ്രസ് പ്രവര്‍ത്തകരെ ആക്രമിച്ചെന്നും മുഖ്യമന്ത്രിയെ കരിക്കൊടി കാണിച്ചതിലുളള രാഷ്ട്രീയ വിരോധമാണ് ആക്രമണത്തിനു പിന്നിലെന്നുമാണ് പൊലീസിന്റെ എഫ് ഐ ആറില്‍ പറയുന്നത്. ആഭ്യന്തര വകുപ്പിന്റെ ചുമതലയുളള മുഖ്യമന്ത്രി ജീവന്‍ രക്ഷാ പ്രവര്‍ത്തനമെന്ന് വിശേഷിപ്പിച്ച സംഭവത്തെ വധശ്രമമെന്നാണ് പൊലീസ് എഫ് ഐ ആറില്‍ രേഖപ്പെടുത്തിയിരിക്കുന്നത്. ചെടിച്ചട്ടിയും ഇരുമ്പുവടിയും ഹെല്‍മെറ്റും കൊണ്ടുളള വധശ്രമം ഇനിയും തുടരണമെന്ന് ആഹ്വാനം ചെയ്ത മുഖ്യമന്ത്രി ഒരു നിമിഷം പോലും ആ പദവിയിലിരിക്കാന്‍ യോഗ്യനല്ല. മുഖ്യമന്ത്രിക്ക് പദവിയൊഴിയാന്‍ മടിയാണെങ്കില്‍ കേരള ജനതയോട് മാപ്പുപറയണം'- വി ഡി സതീശന്‍ പറഞ്ഞു.
മുസിരിസ് പോസ്റ്റിനെ ടെലഗ്രാം, വാട്‌സാപ്പ് എന്നിവയിലൂടേയും ഫോളോ ചെയ്യാം. വീഡിയോ സ്‌റ്റോറികള്‍ക്കായി ഞങ്ങളുടെ യൂട്യൂബ് ചാനല്‍ സബ്‌സ്‌ക്രൈബ് ചെയ്യുക
'ആക്രമണത്തില്‍ പരിക്കേറ്റ സഞ്ജു സന്തോഷിന്റെ കേള്‍വിശക്തി നഷ്ടപ്പെട്ടു. ഒരാള്‍ ഗുരുതര പരിക്കോടെ ഐസിയുവിലാണ്. ഹെല്‍മെറ്റ് കൊണ്ട് അടിയേറ്റ പെണ്‍കുട്ടിയുടെ കയ്യൊടിഞ്ഞു. ഇതിനെയാണ് മുഖ്യമന്ത്രി ജീവന്‍രക്ഷാ പ്രവര്‍ത്തനമെന്ന് വിശേഷിപ്പിച്ചത്. ഈ അക്രമം തുടരണമെന്ന് പറഞ്ഞ മുഖ്യമന്ത്രിയുടെ മനസ് നികൃഷ്ടമാണ്. ക്രിമിനലുകളെ തോല്‍പ്പിക്കുന്ന ക്രൂരമനസാണ് പിണറായി വിജയന്. എത്ര വലിയ മനുഷ്യര്‍ ഇരുന്ന കസേരയിലിരുന്നുകൊണ്ടാണ് പിണറായി വിജയന് ഈ വൃത്തികേടൊക്കെ പറയുന്നത്. അധികാരത്തിന്റെ ധാര്‍ഷ്ട്യം മുഖ്യമന്ത്രിയുടെ തലയ്ക്ക് പിടിച്ചിരിക്കുകയാണ്'- പ്രതിപക്ഷ നേതാവ് കൂട്ടിച്ചേര്‍ത്തു.
