തിരുവനന്തപുരം: വരുന്ന അധ്യായന വര്‍ഷത്തേക്കുള്ള പാഠപുസ്തകങ്ങളുടെ ആദ്യഘട്ട വിതരണം ആരംഭിച്ചു. സംസ്ഥാനത്ത് ഈ വര്‍ഷം അച്ചടിക്കുന്നത് 4.41കോടി പുസ്തകങ്ങളാണ്. മൂന്ന് വാല്യങ്ങളിലായാണ് 1 മുതല്‍ 10 വരെ ക്ലാസുകളിലെ പുസ്തകങ്ങള്‍ അച്ചടിക്കുന്നത്. ഇതില്‍ ഒന്നാം വാല്യത്തിലെ പുസ്തകങ്ങളാണ് വിതരണം ആരംഭിച്ചിരിക്കുന്നത്.
കാക്കനാട് ഗവ. പ്രസില്‍ അച്ചടിക്കുന്ന പുസ്തകങ്ങള്‍ ഷോര്‍ണൂര്‍ ബുക്ക്‌ ഡിപ്പോയില്‍ എത്തിക്കുന്നതും വിതരണം ചെയ്യുന്നതും കുടുംബശ്രീയുടെ നേതൃത്വത്തിലാണ്. കൊവിഡ്‌ കാരണം കഴിഞ്ഞ വര്‍ഷം അച്ചടിച്ച പുസ്തകങ്ങള്‍ കെട്ടി കിടക്കുന്നതിനാല്‍ ഇത്തവണ അച്ചടിക്കുന്ന പുസ്തകങ്ങളുടെ എണ്ണം കുറയും.
ഈ വര്‍ഷത്തെ വര്‍ക്ക് ഓഡര്‍ മേയ് അവസാനത്തോടെ പൂര്‍ത്തിയാക്കാന്‍ സാധിക്കുമെന്നാണ് സര്‍ക്കാര്‍ പറയുന്നത്. ജനുവരി ആദ്യ വാരമാണ് അച്ചടി തുടങ്ങിയത്.
