തൃശൂര്‍: ലൈഫ് മിഷന്‍ കേസില്‍ ഇടക്കാല ജാമ്യം ലഭിച്ച് പുറത്തിറങ്ങിയ മുഖ്യമന്ത്രിയുടെ മുന്‍ പ്രിന്‍സിപ്പല്‍ സെക്രട്ടറി എം ശിവശങ്കറിന്റെ ചിത്രം പങ്കുവെച്ച് കോണ്‍ഗ്രസ് നേതാവ് അനില്‍ അക്കര. ഫേസ്ബുക്കിലാണ് അദ്ദേഹം ശിവശങ്കറിന്റെ ചിത്രം പങ്കുവെച്ചത്. സത്യത്തില്‍ ഈ കാഴ്ച്ച സങ്കടകരമാണെന്നും എന്തിനുവേണ്ടിയാണ് ഈ പീഡാനുഭവം, ഈ കേസില്‍ ഇയാള്‍ മാത്രം ഇത് അനുഭവിച്ച് തീര്‍ത്താല്‍ മതിയോ എന്നാണ് അനില്‍ അക്കര ചോദിക്കുന്നത്. വ്യാഴാഴ്ച്ചയാണ് ലൈഫ് മിഷന്‍ കേസില്‍ എം ശിവശങ്കറിന് സുപ്രീംകോടതി ഇടക്കാല ജാമ്യം അനുവദിച്ചത്.
ചികിത്സാ ആവശ്യങ്ങള്‍ക്കായി രണ്ടുമാസമാണ് ജാമ്യം. ശിവശങ്കറിന് ജാമ്യം അനുവദിക്കുന്നതിനെ എന്‍ഫോഴ്‌സ്‌മെന്റ് ഡയറക്ടറേറ്റ് ശക്തമായി എതിര്‍ത്തെങ്കിലും ചികിത്സാ ആവശ്യം കണക്കിലെടുത്ത് കോടതി ജാമ്യം അനുവദിക്കുകയായിരുന്നു. ഇ ഡി രജിസ്റ്റര്‍ ചെയ്ത ലൈഫ് മിഷന്‍ കോഴക്കേസില്‍ എം ശിവശങ്കര്‍ 5 മാസത്തിലധികമായി ജയിലിലായിരുന്നു.
മുസിരിസ് പോസ്റ്റിനെ ടെലഗ്രാം, വാട്‌സാപ്പ് എന്നിവയിലൂടേയും ഫോളോ ചെയ്യാം. വീഡിയോ സ്‌റ്റോറികള്‍ക്കായി ഞങ്ങളുടെ യൂട്യൂബ് ചാനല്‍ സബ്‌സ്‌ക്രൈബ് ചെയ്യുക
കേസില്‍ ഒന്നാം പ്രതിയാണ് ശിവശങ്കർ. യൂണിടാക്കുമായി നടത്തിയ സാമ്പത്തിക ഇടപാടില്‍ ശിവശങ്കര്‍ കോഴപ്പണം പറ്റിയെന്നും ആ പണം സ്വപ്ന സുരേഷിന്‍റെ അക്കൌണ്ടിലേക്ക് മാറ്റി എന്നുമാണ് ആരോപണം. കേസില്‍ ഇടക്കാല ജാമ്യാപേക്ഷ കഴിഞ്ഞ മാസം അവസാനം കൊച്ചിയിലെ വിചാരണ കോടതി തള്ളിയിരുന്നു. ഇതിനിടെയാണ് ഗുരുതരമായ ആരോഗ്യപ്രശ്നങ്ങള്‍ ചൂണ്ടിക്കാട്ടി ജാമ്യാപേക്ഷയുമായി സുപ്രീംകോടതിയെ സമീപിച്ചത്.
