മലപ്പുറം: ടിപി ചന്ദ്രശേഖരന് വധക്കേസില് കോടതി കുറ്റക്കാരനെന്ന് കണ്ടെത്തിയ സിപിഎം പാനൂര് ഏരിയാ കമ്മിറ്റി അംഗം പികെ കുഞ്ഞനന്തന്റെ മരണത്തില് ദുരൂഹതയാരോപിച്ച് കെ എം ഷാജി. രഹസ്യം ചോരുമോ എന്ന ഭയം വരുമ്പോള് കൊന്നവരെ കൊല്ലുമെന്നും ടിപി ചന്ദ്രേശേഖരന് വധക്കേസില് നേതാക്കളിലേക്ക് എത്താന് കഴിയുന്ന ഏക കണ്ണിയായിരുന്നു കുഞ്ഞനന്തനെന്നും കെ എം ഷാജി പറഞ്ഞു. കൊണ്ടോട്ടിയില് പഞ്ചദിന ജനകീയ പ്രതികരണ യാത്രയുടെ സമാപന സമ്മേളനത്തില് സംസാരിക്കുകയായിരുന്നു അദ്ദേഹം.
'കുഞ്ഞനന്തന് മരിച്ചത് ഭക്ഷ്യവിഷബാധയെ തുടര്ന്നാണ്. കണ്ണൂരിലെ എല്ലാ രാഷ്ട്രീയ കൊലപാതകങ്ങളിലും കൊന്നവര് കൊല്ലപ്പെട്ടിട്ടുണ്ട്. കുറച്ച് ആളുകളെ കൊല്ലാന് വിടും. അവര് കൊന്നുകഴിഞ്ഞ് വരും. കുറച്ചുകഴിഞ്ഞ് ഇവരില് നിന്നും രഹസ്യം ചോര്ന്നേക്കുമോ എന്ന ഭയം വരുമ്പോള് കൊന്നവരെ കൊല്ലും. ഫസല് കൊലപാതകക്കേസിലെ മൂന്ന് പ്രതികളെയും കൊന്നത് സിപിഎമ്മാണ്. ഷുക്കൂര് വധക്കേസിലെ പ്രധാന പ്രതിയെ ആത്മഹത്യ ചെയ്ത നിലയില് കണ്ടെത്തി. ടിപി കേസില് നേതാക്കളിലേക്ക് എത്താന് കഴിയുന്ന ഏക കണ്ണി കുഞ്ഞനന്തനായിരുന്നു. കേരളത്തിലെ മുഖ്യമന്ത്രിയിലേക്ക് അന്വേഷണം വരുമോ എന്ന ഭയമാണ്'- കെ എം ഷാജി പറഞ്ഞു.
മുസിരിസ് പോസ്റ്റിനെ ടെലഗ്രാം, വാട്സാപ്പ് എന്നിവയിലൂടേയും ഫോളോ ചെയ്യാം. വീഡിയോ സ്റ്റോറികള്ക്കായി ഞങ്ങളുടെ യൂട്യൂബ് ചാനല് സബ്സ്ക്രൈബ് ചെയ്യുക
ടിപി ചന്ദ്രശേഖരന് കൊലപാതകക്കേസില് 13-ാം പ്രതിയായിരുന്നു കുഞ്ഞനന്തന്. ജീവപര്യന്തം ശിക്ഷിക്കപ്പെട്ട് ജയിലില് ശിക്ഷ അനുഭവിച്ചു വരികയായിരുന്നു. അസുഖബാധിതനായി ഒരുവര്ഷം തിരുവനന്തപുരം മെഡിക്കല് കോളേജില് ചികിത്സയിലായിരുന്നു. 2020- ജൂണില് വയറ്റിലെ അണുബാധ മൂര്ച്ഛിച്ചതിനെ തുടര്ന്ന് ഐസിയുവിലേക്ക് മാറ്റുകയും പിന്നീട് മരണം സംഭവിക്കുകയുമായിരുന്നു.