കണ്ണൂര്‍: പാനൂരില്‍ ബോംബ് നിര്‍മ്മാണത്തിനിടെ കൊല്ലപ്പെട്ടവരുടെ പേരില്‍ സിപിഎം നിര്‍മ്മിച്ച 'സ്മൃതി മണ്ഡപ'ത്തിന്റെ ഉദ്ഘാടനം സംസ്ഥാന സെക്രട്ടറി എംവി ഗോവിന്ദന്‍ നിര്‍വഹിക്കും. കൊളവല്ലൂര്‍ തെക്കുംമുറിയിലാണ് സിപിഎം തൃപ്പങ്ങോട്ടൂര്‍ ലോക്കല്‍ കമ്മിറ്റി 'രക്തസാക്ഷി മണ്ഡപം' നിര്‍മ്മിക്കുന്നത്. വൈകുന്നേരം അഞ്ചുമണിക്ക് നടക്കുന്ന ഉദ്ഘാടന ചടങ്ങില്‍ സിപിഎം കണ്ണൂര്‍ ജില്ലാ സെക്രട്ടറി എം വി ജയരാജന്‍, സംസ്ഥാന കമ്മിറ്റിയംഗം പി ജയരാജന്‍ എന്നിവരും പങ്കെടുക്കുമെന്നാണ് വിവരം. വിഷയത്തില്‍ പ്രതികരിക്കാന്‍ പാര്‍ട്ടി നേതൃത്വമോ സംസ്ഥാന സെക്രട്ടറിയോ ഇതുവരെ തയ്യാറായിട്ടില്ല.
2015 ജൂണ്‍ ആറിന് ബോംബ് നിര്‍മ്മാണത്തിനിടെ കൊല്ലപ്പെട്ട സുബീഷ്, ഷൈജു എന്നിവരുടെ പേരിലാണ് സ്മൃതി മണ്ഡപം. കൊളവല്ലൂര്‍ ഈസ്റ്റ് ചെറ്റക്കണ്ടിയിലെ കാക്രൂട്ട് കുന്നിന്‍മുകളില്‍ ബോംബ് നിര്‍മ്മാണത്തിനിടെ സ്‌ഫോടനം നടക്കുകയായിരുന്നു. സ്‌ഫോടനത്തില്‍ മറ്റ് നാലുപേര്‍ക്ക് ഗുരുതരമായി പരിക്കേല്‍ക്കുകയും ചെയ്തിരുന്നു. അന്ന് സിപിഎം സംസ്ഥാന സെക്രട്ടറിയായിരുന്ന കോടിയേരി ബാലകൃഷ്ണന്‍ ബോംബ് നിര്‍മ്മിച്ചവരെ തളളിപ്പറയുകയായിരുന്നു.
മുസിരിസ് പോസ്റ്റിനെ ടെലഗ്രാം, വാട്‌സാപ്പ് എന്നിവയിലൂടേയും ഫോളോ ചെയ്യാം. വീഡിയോ സ്‌റ്റോറികള്‍ക്കായി ഞങ്ങളുടെ യൂട്യൂബ് ചാനല്‍ സബ്‌സ്‌ക്രൈബ് ചെയ്യുക
ബോംബ് നിര്‍മ്മിച്ചവര്‍ പാര്‍ട്ടി പ്രവര്‍ത്തകരല്ലെന്നും പാര്‍ട്ടിക്ക് സംഭവവുമായി യാതൊരു ബന്ധവുമില്ലെന്നും കോടിയേരി ബാലകൃഷ്ണന്‍ പറഞ്ഞിരുന്നു. എന്നാല്‍ പോസ്റ്റ്മാര്‍ട്ടത്തിനു ശേഷം ഷൈജുവിന്റെയും സുബീഷിന്റെയും മൃതദേഹങ്ങള്‍ ഏറ്റുവാങ്ങിയത് അന്ന് സിപിഎം കണ്ണൂര്‍ ജില്ലാ സെക്രട്ടറിയായിരുന്ന പി ജയരാജനായിരുന്നു.
