ഡല്ഹി: ജമ്മുകശ്മീരിന്റെ സംസ്ഥാന പദവി പുനസ്ഥാപിക്കണമെന്ന് കോണ്ഗ്രസ് നേതാവ് രാഹുല് ഗാന്ധി. ജമ്മു കശ്മീരില് സ്വതന്ത്രവും നീതിയുക്തവുമായ തെരഞ്ഞെടുപ്പ് നടക്കണമെന്നും രാഹുല് ഗാന്ധി പറഞ്ഞു. രണ്ട് ദിവസത്തെ സന്ദര്ശനത്തിനായി ജമ്മുകശ്മീരിലെത്തിയ രാഹുല് ഗാന്ധി ശ്രീനഗറില് പാര്ട്ടി പ്രവര്ത്തകരെ അഭിസംബോധന ചെയ്യുകയായിരുന്നു.
'ജമ്മു കശ്മീരിന് സമ്പൂര്ണ്ണ സംസ്ഥാന പദവി പുനസ്ഥാപിക്കണമെന്നും ഇവിടെ സ്വതന്ത്രവും നീതിപൂര്വ്വവുമായ തെരഞ്ഞെടുപ്പ് നടത്തണമെന്നും ഞങ്ങള് ആവശ്യപ്പെടുന്നു. സര്ക്കാര് രാജ്യത്തെ ഭരണഘടാന സ്ഥാപനങ്ങളെയും അവര് ആക്രമിച്ചു. രാജ്യത്തെ ജനപ്രതിനിധി സഭകളെയും നീതിന്യായ വ്യവസ്ഥയെയും ആക്രമിച്ചു. മാധ്യമങ്ങളെ അടിച്ചമര്ത്തി. അവര് രാജ്യത്തെ മുഴുവന് ആക്രമിക്കുകയാണ്'- രാഹുല് ഗാന്ധി പറഞ്ഞു.
മുസിരിസ് പോസ്റ്റിനെ ടെലഗ്രാം, വാട്സാപ്പ് എന്നിവയിലൂടേയും ഫോളോ ചെയ്യാം. വീഡിയോ സ്റ്റോറികള്ക്കായി ഞങ്ങളുടെ യൂട്യൂബ് ചാനല് സബ്സ്ക്രൈബ് ചെയ്യുക
പ്രത്യേക പദവി റദ്ദാക്കിയതിനുശേഷം ഇതാദ്യമായാണ് രാഹുല് ഗാന്ധി ജമ്മുകശ്മീര് സന്ദര്ശിക്കുന്നത്. നേരത്തേ കശ്മീരിന്റെ പ്രത്യേക പദവി റദ്ദാക്കിയതിനുപിന്നാലെ രാഹുല് ഗാന്ധിയും കോണ്ഗ്രസ് നേതാക്കളും കശ്മീരിലേക്ക് എത്തിയിരുന്നെങ്കിലും ശ്രീനഗര് വിമാനത്താവളത്തില് വച്ച് സംഘത്തെ തിരിച്ചയച്ചിരുന്നു.