ഗുവാഹത്തി: സഹപാഠിയെ പീഡിപ്പിച്ച പ്രതിക്ക് ജാമ്യം അനുവദിച്ച് ഗുവാഹത്തി ഹൈക്കോടതി. പീഡനം നേരിട്ട പെണ്കുട്ടിയേയും, പ്രതിയേയും രാജ്യത്തിന്റെ ഭാവി വാഗ്ദാനമെന്ന് വിശേഷിപ്പിച്ചാണ് കോടതി ജാമ്യം നല്കിയത്. അന്വേഷണം പൂര്ത്തിയായ ഈ ഘട്ടത്തില്, ആരോപണ വിധേയനായ വ്യക്തിയേയും പീഡനം അതിജീവിച്ച പെണ്കുട്ടിയേയും നാടിന്റെ ഭാവി വാഗ്ദാനങ്ങളായാണ് കാണുന്നത്. ഐ.ഐ.ടി ഗുവാഹത്തിയില് പഠിക്കുന്ന മിടുക്കരായ വിദ്യാര്ഥികളാണ് രണ്ടു പേരും. പ്രതിയെ തടവില് വെയ്ക്കേണ്ട ആവശ്യമില്ലായെന്നും കോടതി വിധിന്യായത്തില് പറഞ്ഞു.
പെണ്കുട്ടിയും കുറ്റാരോപിതനും 19-20 വയസിനിടയില് പ്രായമുള്ളവരാണ്. അതോടൊപ്പം വ്യത്യസ്ത സംസ്ഥാനങ്ങളില് നിന്നുള്ളവരാണ്. പ്രതി ജാമ്യത്തിലിറങ്ങിയാലും തെളിവ് നശിപ്പിക്കാനോ സാക്ഷികളെ സ്വാധീനിക്കാനോ സാധിക്കില്ലെന്നും ജസ്റ്റിസ് അജിത് ബോര്താകുര് പറഞ്ഞു. അതിനാല് 30,000 രൂപയുടേയും രണ്ട് പേരുടെ ആള് ജാമ്യത്തിന്റെയും ബലത്തിലാണ് ഹൈക്കോടതി പ്രതിക്ക് ജാമ്യം അനുവദിച്ചത്. ഈ വര്ഷം മാര്ച്ച് 28നായിരുന്നു കേസിനാസ്പദമായ സംഭവം. പീഡനം നേരിട്ട പെണ്കുട്ടിയെ പിറ്റേദിവസം സുഹൃത്തുക്കള് രക്ഷപ്പെടുത്തി ആശുപത്രിയിലെത്തിക്കുകയായിരുന്നു. ഏപ്രില് 3നാണ് പ്രതി അറസ്റ്റിലായത്.