ഡല്ഹി: ട്രിബ്യൂണലുകളുടെ പ്രവര്ത്തനവുമായി ബന്ധപ്പെട്ട് കേന്ദ്രസര്ക്കാരിന് സുപ്രീം കോടതിയുടെ രൂക്ഷവിമര്ശനവും അന്ത്യശാസനയും. രാജ്യത്തെ ട്രിബ്യൂണലുകളെ ദുര്ബലപ്പെടുത്താനാണ് കേന്ദ്ര സര്ക്കാര് ശ്രമിക്കുന്നത് എന്ന് സുപ്രീം കോടതി പറഞ്ഞു. നിരവധി ട്രിബ്യൂണലുകളില് മതിയായ രീതിയില് ഉദ്യോഗസ്ഥരെ നിയമിക്കാതെ സര്ക്കാര് സമയം നീട്ടിക്കൊണ്ടുപോകുകയാണ്. ചെയര്മാനും അംഗങ്ങളുമില്ലാത്തതിനാല് പല ട്രിബ്യൂണലുകളുടെയും താളം തെറ്റിയിരിക്കുകയാണ്. ട്രിബ്യൂണലുകളിലെ അധ്യക്ഷ പദവിയടക്കമുള്ള ഒഴിവുകള് അടുത്ത തിങ്കളാഴ്ചയ്ക്കകം നികത്തണമെന്ന് കേന്ദ്ര സര്ക്കാരിനോട് സുപ്രീം കോടതി ആവശ്യപ്പെട്ടു. ട്രൈബ്യൂണല് പരിഷ്കരണം സംബന്ധിച്ച നിയമം ചോദ്യം ചെയ്തുകൊണ്ട് സമര്പ്പിച്ച ഹര്ജിയിലാണ് കോടതിയുത്തരവ്.
ട്രിബ്യൂണലുകളിലെ അധ്യക്ഷ പദവിയടക്കമുള്ള നിയമനങ്ങള് ഉടന് നടത്തുമെന്ന് കഴിഞ്ഞ സിറ്റിങ്ങില് കേന്ദ്രം സുപ്രീം കോടതിയില് ഉറപ്പ് നല്കിയിരുന്നു. എന്നാല് ഇതുവരെ കേന്ദ്ര അഡ്മിനിസ്ട്രേറ്റീവ് ട്രിബ്യൂണലില് മാത്രമാണ് നിയമനം നടത്തിയത് എന്ന് സോളിസിറ്റര് ജനറല് കോടതിയെ അറിയിച്ചു. ഇതാണ് കോടതിയുടെ രൂക്ഷ വിമര്ശനത്തിനും താക്കീതിനും കാരണം. അടുത്ത തിങ്കളാഴ്ചയ്ക്കകം അധ്യക്ഷ പദവിയടക്കം ഒഴിവുള്ള എല്ലാം പോസ്റ്റുകളിലും നിയമനം നടത്തണമെന്ന് ചീഫ് ജസ്റ്റിസ് എന് വി രമണ അധ്യക്ഷനായ ബഞ്ച് കേന്ദ്ര സര്ക്കാരിനോട് ആവശ്യപ്പെട്ടു. രാജ്യത്തെ പല ട്രിബ്യൂണലുകളും അടച്ചുപൂട്ടലിന്റെ വക്കിലാണ്. ഈ പ്രശ്നം ഉടന് പരിഹരിക്കണമെന്ന് കോടതി സര്ക്കാരിനോട് ആവശ്യപ്പെട്ടു.
നിലവില് അധ്യക്ഷന്മാര് ഇല്ലാത്ത ട്രിബ്യൂണലുകളുടെ എണ്ണം 19 ആണ്. എന്നാല് ആകെയുള്ള ട്രിബ്യൂണലുകളില് ജുഡീഷ്യല് അംഗങ്ങളുടെ 110 ഒഴിവുകളും മറ്റംഗങ്ങളുടെ 111 ഒഴിവുകളുമാണുള്ളത്. ഇത് ഒരാഴ്ചയ്ക്കകം നികത്തണമെന്നാണ് ഇപ്പോള് സുപ്രീം കോടതി ആവശ്യപ്പെട്ടിരിക്കുന്നത്.