ഡല്‍ഹി: ആന്ധ്രാപ്രദേശിലെ മുതിര്‍ന്ന സിപിഎം നേതാവും കര്‍ഷകരുടെ മോചനത്തിനും ക്ഷേമത്തിനുമായി അവസാനം വരെ പോരാടിയ മല്ലു സ്വരാജ്യം അന്തരിച്ചു. തെലങ്കാനയിലെ കർഷകപ്രക്ഷോഭത്തിൽ സായുധസേനയുടെ കമാൻഡറായിരുന്നു മല്ലു സ്വരാജ്യം. വാര്‍ധക്യ സഹജമായ അസുഖങ്ങളാല്‍ കുറച്ച് ദിവസങ്ങളായി ആശുപത്രിയിലായിരുന്നു. ഹൈദരാബാദിലെ ബഞ്ചാരാഹിൽസിലുള്ള കേർ ആശുപത്രിയില്‍ വെച്ചായിരുന്നു അന്ത്യം. 11-ാമത്തെ വയസില്‍ തൊഴിലാളികള്‍ക്ക് അരി വിതരണം ചെയ്താണ് സ്വരാജ്യം തന്‍റെ രാഷ്ട്രീയ ജീവിതം അരംഭിക്കുന്നത്.
കര്‍ഷക പ്രക്ഷോഭത്തിന് നേതൃത്വം നല്‍കിയതിന് അന്നത്തെ കാലത്ത് സ്വരാജ്യത്തിന്റെ തലക്ക് പതിനായിരം രൂപയാണ് അധികാരികള്‍ ഇനാം പ്രഖ്യാപിച്ചത്. ഇതിലൊന്നും പതറാതെ സഹോദരനും ഭര്‍ത്താവിനുമൊപ്പം സാമൂഹിക പ്രവര്‍ത്തനത്തില്‍ ശ്രദ്ധ പതിപ്പിക്കാന്‍ ഇവര്‍ക്ക് സാധിച്ചു. പ്രവര്‍ത്തന മേഖലയിലെ ആത്മാര്‍ത്ഥത കൊണ്ട് കമ്മ്യൂണിസ്റ്റ് പാര്‍ട്ടിയിലെ മാറ്റി നിര്‍ത്തപ്പെടാന്‍ സാധിക്കാത്ത നേതാവെന്ന നിലയില്‍ സ്വരാജ്യം വളര്‍ന്നു വന്നു. നാൽഗൊണ്ട മണ്ഡലത്തെ പാര്‍ലമെന്‍റില്‍ പ്രതിനിധീകരിച്ചു. സിപിഎമ്മിന്‍റെ 21-ാം പാര്‍ട്ടി കോണ്‍ഗ്രസിന് തെലുങ്കാനയില്‍ പതാക ഉയര്‍ത്തിയതും മല്ലു സ്വരാജ്യമാണ്. ലോക്സഭാംഗം, സി പി ഐ എം കേന്ദ്രകമ്മിറ്റി അംഗം എന്നീ നിലകളിലും മല്ലു സ്വരാജ്യം പ്രവര്‍ത്തിച്ചിട്ടുണ്ട്.
മുസിരിസ് പോസ്റ്റിനെ ടെലഗ്രാം, വാട്‌സാപ്പ് എന്നിവയിലൂടേയും ഫോളോ ചെയ്യാം. വീഡിയോ സ്‌റ്റോറികള്‍ക്കായി ഞങ്ങളുടെ യൂട്യൂബ് ചാനല്‍ സബ്‌സ്‌ക്രൈബ് ചെയ്യുക
കമ്യൂണിസ്റ്റ് പാര്‍ട്ടിയുടെ മുതിര്‍ന്ന വനിതാ നേതാവിന്‍റെ നിര്യാണത്തില്‍ മുഖ്യമന്ത്രി പിണറായി വിജയന്‍ അനുശോചിച്ചു. ഇന്ത്യന്‍ വിപ്ലവ പ്രസ്ഥാനത്തിന്റെ കെടാവിളക്കായ ജീവിതമായിരുന്നു മല്ലു സ്വരാജ്യത്തിന്റേതെന്ന് മുഖ്യമന്ത്രി ഫേസ്ബുക്കില്‍ കുറിച്ചു.
ഫേസ്ബുക്ക് കുറിപ്പിന്‍റെ പൂര്‍ണരൂപം
ഇന്ത്യൻ വിപ്ലവ പ്രസ്ഥാനത്തിന്റെ കെടാവിളക്കായ ജീവിതമായിരുന്നു മല്ലു സ്വരാജ്യത്തിന്റേത്. തെലങ്കാന സമരത്തിൽ സായുധസേനയെ നയിച്ച മല്ലു സ്വരാജ്യം, കർഷകരുടെ മോചനത്തിനും കർഷക ക്ഷേമം ഉറപ്പുവരുത്തുന്നതിനും ജീവിതാന്ത്യം വരെ പോരാടി. അനീതിക്കെതിരായ സമരമായിരുന്നു ആ ജീവിതം. അവരുടെ മുന്നിലെത്തുമ്പോൾ നിസ്വവർഗത്തിനായി സ്വജീവൻ പണയം വെച്ച് പോരാടിയ ധീര സേനാനായികയുടെ ചിത്രമാണ് മനസ്സിൽ തെളിയുക. ലോക്സഭാംഗം, സിപിഐ എം കേന്ദ്രകമ്മിറ്റി അംഗം എന്നീ നിലകളിലും മല്ലു സ്വരാജ്യത്തിന്റെ ഇടപെടലുകൾ സവിശേഷമായിരുന്നു. ആ അമ്മയുടെ വിയോഗത്തിൽ അനുശോചനം രേഖപ്പെടുത്തുന്നു, സഖാക്കളുടെ ദുഃഖത്തിൽ പങ്കു ചേരുന്നു.
