മുംബൈ: ഹിന്ദി ഇന്ത്യയുടെ മാതൃഭാഷയും ദേശീയ ഭാഷയുമാണെന്ന ബോളിവുഡ് നടന്‍ അജയ് ദേവ്ഗണിന്റെ പരാമര്‍ശത്തെ വിമര്‍ശിച്ച് കോണ്‍ഗ്രസ് നേതാവും നടിയുമായ രമ്യ സ്പന്ദന. ഹിന്ദി ഇന്ത്യയുടെ ദേശീയ ഭാഷയല്ലെന്നും അജയ് ദേവ്ഗണിന്റെ അജ്ഞത അമ്പരപ്പിക്കുന്നതാണെന്നും രമ്യ സ്പന്ദന പറഞ്ഞു. ട്വിറ്ററിലൂടെയായിരുന്നു മുന്‍ പാര്‍ലമെന്റ് അംഗം കൂടിയായ രമ്യയുടെ പ്രതികരണം.
'ഹിന്ദി നമ്മുടെ ദേശീയ ഭാഷയല്ല. അജയ് ദേവ്ഗണ്‍, നിങ്ങളുടെ അജ്ഞത അമ്പരപ്പിക്കുന്നതാണ്. കെജിഎഫ്, ആര്‍ ആര്‍ ആര്‍, പുഷ്പ തുടങ്ങിയ ചിത്രങ്ങള്‍ ഹിന്ദി പ്രേക്ഷകര്‍ക്കിടയില്‍ മികച്ച പ്രതികരണം നേടി പ്രദര്‍ശനം തുടരുന്നത് വലിയ കാര്യമാണ്. കലയ്ക്ക് ഭാഷയില്ല. ഞങ്ങള്‍ നിങ്ങളുടെ സിനിമകള്‍ ആസ്വദിക്കുന്നതുപോലെ നിങ്ങള്‍ ഞങ്ങളുടെ സിനിമകളും ആസ്വദിക്കൂ' എന്നാണ് രമ്യ ട്വീറ്റ് ചെയ്തത്. #StopHindiImposition എന്ന ഹാഷ്ടാഗിനൊപ്പമാണ് രമ്യയുടെ ട്വീറ്റ്.
മുസിരിസ് പോസ്റ്റിനെ ടെലഗ്രാം, വാട്‌സാപ്പ് എന്നിവയിലൂടേയും ഫോളോ ചെയ്യാം. വീഡിയോ സ്‌റ്റോറികള്‍ക്കായി ഞങ്ങളുടെ യൂട്യൂബ് ചാനല്‍ സബ്‌സ്‌ക്രൈബ് ചെയ്യുക
ഹിന്ദി ഭാഷയുടെ പേരില്‍ കന്നഡ നടന്‍ കിച്ച സുദീപും അജയ് ദേവ്ഗണും തമ്മില്‍ സമൂഹമാധ്യത്തില്‍ നടന്ന വാക്‌പോര് ദേശീയ തലത്തില്‍ ചര്‍ച്ചയായിരിക്കുകയാണ്. ഇപ്പോഴത്തെ പാന്‍ ഇന്ത്യന്‍ ചിത്രങ്ങള്‍ കണക്കിലെടുത്താല്‍ ഹിന്ദിയെ ദേശീയ ഭാഷയായി കാണാനാകില്ലെന്ന് കിച്ച സുദീപ് ഒരു അഭിമുഖത്തില്‍ പറഞ്ഞിരുന്നു. ഇതിനുമറുപടിയായി ഹിന്ദി ദേശീയ ഭാഷയല്ലെങ്കില്‍ നിങ്ങളുടെ മാതൃഭാഷയിലിറങ്ങുന്ന ചിത്രങ്ങള്‍ എന്തിനാണ് ഹിന്ദിയിലേക്ക് ഡബ്ബ് ചെയ്ത് റിലീസ് ചെയ്യുന്നത്. ഹിന്ദി അന്നും ഇന്നും നമ്മുടെ ദേശീയ ഭാഷയാണ്. അത് ദേശീയ ഭാഷയായി തുടരും എന്ന് അജയ് ദേവ്ഗണ്‍ ഹിന്ദിയില്‍ ട്വീറ്റ് ചെയ്തു.
'പ്രിയപ്പെട്ട അജയ് ദേവ്ഗണ്‍. താങ്കള്‍ ഹിന്ദിയില്‍ ഇട്ട ട്വീറ്റ് എനിക്ക് മനസിലായി. കാരണം ഞങ്ങള്‍ ഹിന്ദിയെന്ന ഭാഷയെ ബഹുമാനിക്കുകയും സ്‌നേഹിക്കുകയും പഠിക്കുകയും ചെയ്തിട്ടുണ്ട്. എന്നാല്‍ പറയുന്നതുകൊണ്ട് ഒന്നുംതോന്നരുത്. താങ്കളുടെ ട്വീറ്റിന് ഞാന്‍ കന്നഡയില്‍ മറുപടി പറഞ്ഞാല്‍ എങ്ങനെയിരിക്കും. ഞങ്ങളും ഇന്ത്യയിലുളളവര്‍ തന്നെയല്ലേ സാര്‍' എന്നാണ് കിച്ച സുദീപ് നല്‍കിയ മറുപടി. സംഭവം വിവാദമായതിനുപിന്നാലെ കിച്ച സുദീപിനെ പിന്തുണച്ച് കര്‍ണാടക മുന്‍ മുഖ്യമന്ത്രിമാരായ സിദ്ധരാമയ്യയും കുമാരസ്വാമിയുമടക്കം നിരവധിപേരാണ് രംഗത്തെത്തിയത്.
