കൊല്‍ക്കത്ത: 2024-ലെ പൊതുതെരഞ്ഞെടുപ്പില്‍ ബിജെപിയെ തറപറ്റിക്കുമെന്ന് തൃണമൂല്‍ കോണ്‍ഗ്രസ് നേതാവും പശ്ചിമ ബംഗാള്‍ മുഖ്യമന്ത്രിയുമായ മമതാ ബാനര്‍ജി. കളി തുടങ്ങിയിട്ടേയുളളു എന്നും ഝാര്‍ഖണ്ഡ് മുഖ്യമന്ത്രി ഹേമന്ത് സോറനും ബിഹാര്‍ മുഖ്യമന്ത്രി നിതീഷ് കുമാറും ഉള്‍പ്പെടെ പ്രതിപക്ഷത്തെ നേതാക്കളോടൊപ്പം ചേര്‍ന്ന് ബിജെപിയുടെ എല്ലാ തന്ത്രങ്ങളും തകര്‍ത്ത് അവരെ പരാജയപ്പെടുത്തുമെന്നും മമതാ ബാനര്‍ജി പറഞ്ഞു. കൊല്‍ക്കത്തയില്‍ തൃണമൂല്‍ കോണ്‍ഗ്രസ് പ്രവര്‍ത്തകരെ അഭിസംബോധന ചെയ്യുകയായിരുന്നു അവര്‍.
മുസിരിസ് പോസ്റ്റിനെ ടെലഗ്രാം, വാട്‌സാപ്പ് എന്നിവയിലൂടേയും ഫോളോ ചെയ്യാം. വീഡിയോ സ്‌റ്റോറികള്‍ക്കായി ഞങ്ങളുടെ യൂട്യൂബ് ചാനല്‍ സബ്‌സ്‌ക്രൈബ് ചെയ്യുക
'ഓരോ എം എല്‍ എമാര്‍ക്കും പത്തുകോടി രൂപ വാഗ്ദാനം ചെയ്താണ് അവര്‍ സര്‍ക്കാരിനെ താഴെയിറക്കാന്‍ ശ്രമിച്ചത്. ഞാന്‍ അവരെ കയ്യോടെ പിടികൂടി. ബിജെപിയോട് ഏറ്റുമുട്ടാന്‍ എല്ലാവരും തയാറാകണം. ഞാനും നിതീഷ് കുമാറും ഹേമന്ത് സോറനും അഖിലേഷ് യാദവുമുള്‍പ്പെടെ പ്രതിപക്ഷത്തെ നേതാക്കള്‍ 2024-ല്‍ ബിജെപിയെ പരാജയപ്പെടുത്താനായി ഒന്നിക്കും. നമ്മളെല്ലാവരും ഒന്നിച്ച് ഒരുവശത്തും ബിജെപി മറുവശത്തുമായിരിക്കും'-മമതാ ബാനര്‍ജി പറഞ്ഞു.
സി ബി ഐയും എന്‍ഫോഴ്‌സ്‌മെന്റ് ഡയറക്ടറേറ്റുമുള്‍പ്പെടെയുളള കേന്ദ്ര ഏജന്‍സികളെ ഉപയോഗിച്ച് ഭയപ്പെടുത്താമെന്ന് ബിജെപി കരുതേണ്ടെന്നും മമതാ ബാനര്‍ജി കൂട്ടിച്ചേര്‍ത്തു.
