കൊല്ക്കത്ത: നേതാജി സുഭാഷ് ചന്ദ്രബോസിന്റെ ജന്മദിനം ആഘോഷിക്കാനുളള ആര്എസ്എസിന്റെ തീരുമാനത്തിനെതിരെ വിമര്ശനവുമായി അദ്ദേഹത്തിന്റെ മകള് അനിതാ ബോസ്. നേതാജി ഇടതുപക്ഷക്കാരനായിരുന്നു എന്നും ആര്എസ്എസിന്റെ പ്രത്യയശാസ്ത്രവും സുഭാഷ് ചന്ദ്രബോസിന്റെ ആശയവും രണ്ട് ധ്രുവങ്ങളില് നില്ക്കുന്നവയാണെന്നും അനിതാ ബോസ് പറഞ്ഞു. പ്രത്യയശാസ്ത്രത്തെക്കുറിച്ച് പറയുകയാണെങ്കില്, രാജ്യത്തെ മറ്റേതൊരു പാര്ട്ടിയേക്കാളും കോണ്ഗ്രസിനോടാണ് നേതാജിക്ക് അടുപ്പമെന്നും അവര് പറഞ്ഞു.
'ഹിന്ദു മതവിശ്വാസിയായിരുന്നിട്ടും നേതാജി എല്ലാ മതങ്ങളെയും ബഹുമാനിച്ചിരുന്നു. എല്ലാ മതങ്ങളെയും ബഹുമാനിക്കുക എന്ന ആശയത്തെ ബിജെപിയും ആര്എസ്എസും പ്രതിഫലിപ്പിക്കുന്നില്ല. എല്ലാ മതവിഭാഗങ്ങളിലുമുളളവര് പരസ്പരം സഹകരിക്കുന്നതിനെ ബോസ് അനുകൂലിച്ചിരുന്നു. നേതാജിയുടെ ആശയങ്ങളും നിലപാടുകളും ഉള്ക്കൊളളണമെന്ന് ആര്എസ്എസിന് തോന്നിയാല് അത് നന്നായിരിക്കും. അദ്ദേഹത്തിന്റെ ജന്മദിനം ആഘോഷിക്കാന് ആഗ്രഹിക്കുന്നവര് ആ ആശയങ്ങളോട് യോജിക്കുന്നവരായിരിക്കണം'- അനിതാ ബോസ് പറഞ്ഞു.
മുസിരിസ് പോസ്റ്റിനെ ടെലഗ്രാം, വാട്സാപ്പ് എന്നിവയിലൂടേയും ഫോളോ ചെയ്യാം. വീഡിയോ സ്റ്റോറികള്ക്കായി ഞങ്ങളുടെ യൂട്യൂബ് ചാനല് സബ്സ്ക്രൈബ് ചെയ്യുക
നേതാജിയുടെ ജന്മവാര്ഷികത്തോടനുബന്ധിച്ച് കൊല്ക്കത്ത ഷാഹിര് മിനാര് ഗ്രൗണ്ടില് നടക്കുന്ന പൊതുപരിപാടിയില് മോഹന് ഭാഗവത് സംസാരിക്കുമെന്ന് ആര്എസ്എസ് നേരത്തെ പ്രഖ്യാപിച്ചിരുന്നു. ഈ പശ്ചാത്തലത്തിലാണ് അനിതാ ബോസിന്റെ പ്രതികരണം.