കൊച്ചി: പുതിയ സിനിമകള്‍ റിലീസാവുന്ന ദിവസം തന്നെ മോശം റിവ്യൂകള്‍ കൊടുത്ത് സിനിമകളെ തകര്‍ക്കുന്ന സംഘം സജീവമാണെന്ന് നടി മഞ്ജു പിളള. സിനിമയെക്കുറിച്ച് മോശം പരാമര്‍ശങ്ങളാണ് റിവ്യൂ എന്ന നിലയില്‍ പ്രചരിക്കുന്നതെന്നും അവയില്‍ പലതും അടിസ്ഥാനമില്ലാത്ത വിമര്‍ശനങ്ങളാണെന്നും മഞ്ജു പിളള പറഞ്ഞു. ഓ മൈ ഡാര്‍ലിംഗ് എന്ന സിനിമയുടെ പ്രമോഷന്റെ ഭാഗമായി ദുബായില്‍ മാധ്യമങ്ങളോട് സംസാരിക്കുകയായിരുന്നു അവര്‍. ഒരുപാടുപേരുടെ കൂട്ടായ പ്രവര്‍ത്തനവും ജീവിതമാര്‍ഗവുമാണ് സിനിമയെന്നും അതിനെ ഇല്ലാതാക്കാനുളള ശ്രമമാണ് ഇത്തരക്കാര്‍ നടത്തുന്നതെന്നും നടന്‍ മുകേഷ് പറഞ്ഞു.
യൂട്യൂബര്‍മാര്‍ക്കു പിന്നില്‍ ഗൂഢ സംഘമുണ്ടെന്നും അവര്‍ കാശുകൊടുത്താല്‍ എത്ര നല്ല സിനിമയെയും മോശം സിനിമയെന്ന് പറയുകയും ചെയ്യുമെന്ന ഗണേഷ് കുമാര്‍ എംഎല്‍എയുടെ പ്രസ്താവന ശരിവയ്ക്കുന്നതാണ് തന്റെ അനുഭവമെന്ന് ഓ മൈ ഡാര്‍ലിംഗിന്റെ നിര്‍മ്മാതാവ് മനോജ് ശ്രീകണ്ഠന്‍ പറഞ്ഞു. യുവതാരങ്ങളായ അനിഘ സുരേന്ദ്രനും മെല്‍വിന്‍ ജി ബാബുവും കേന്ദ്രകഥാപാത്രങ്ങളായെത്തിയ ചിത്രം ഫെബ്രുവരി 24-നാണ് തിയറ്ററുകളിലെത്തിയത്.
മുസിരിസ് പോസ്റ്റിനെ ടെലഗ്രാം, വാട്‌സാപ്പ് എന്നിവയിലൂടേയും ഫോളോ ചെയ്യാം. വീഡിയോ സ്‌റ്റോറികള്‍ക്കായി ഞങ്ങളുടെ യൂട്യൂബ് ചാനല്‍ സബ്‌സ്‌ക്രൈബ് ചെയ്യുക
നവാഗതനായ ആല്‍ഫ്രഡ് ഡി സാമുവല്‍ സംവിധാനം ചെയ്ത ചിത്രം ഗര്‍ഭപാത്രമില്ലാതെ ജനിക്കുന്ന പെണ്‍കുട്ടിയുടെ കഥയാണ് പറയുന്നത്. മുകേഷ്, ലെന, മഞ്ജു പിളള, ജോണി ആന്റണി, വിജയരാഘവന്‍, ശ്രീകാന്ത് മുരളി, നന്ദു, ഡെയ്ന്‍ ഡേവിസ് തുടങ്ങിയവരാണ് ചിത്രത്തിലെ മറ്റ് പ്രധാന കഥാപാത്രങ്ങളെ അവതരിപ്പിച്ചിരിക്കുന്നത്.
