തിരുവനന്തപുരം: മുഴുവന്‍ എ പ്ലസ് കിട്ടിയ വിദ്യാര്‍ഥികള്‍ക്ക് പോലും ഇഷ്ടമുള്ള വിഷയങ്ങള്‍ പഠിക്കാന്‍ കഴിയാത്ത അവസ്ഥ സംജാതമായതോടെ പ്ലസ് വണ്ണിന് 97 താല്‍ക്കാലിക അധിക ബാച്ചുകള്‍ അനുവദിക്കാന്‍ സംസ്ഥാന സര്‍ക്കാര്‍ തീരുമാനിച്ചു. പ്രവേശനം ഏറ്റവും പ്രതിസന്ധി സൃഷ്ടിച്ച മലപ്പുറം, കോഴിക്കോട് ജില്ലകള്‍ക്ക് പ്രത്യേക പരിഗണന നല്‍കിയാണ്‌ പുതിയ ബാച്ചുകള്‍ അനുവദിച്ചത്. ആകെ അനുവദിച്ച 97 താല്‍ക്കാലിക ബാച്ചുകളില്‍ 64 എണ്ണവും കോഴിക്കോട്, മലപ്പുറം ജില്ലകളിലാണ്.
മലപ്പുറം ജില്ലക്കാണ് ഏറ്റവുമധികം പരിഗണന നല്‍കിയത്. 53 പുതിയ പ്ലസ് വണ്‍ ബാച്ചുകളാണ് മലപ്പുറം ജില്ലക്കായി അനുവദിച്ചിരിക്കുന്നത്. കോഴിക്കോട് 11 പുതിയ ബാച്ചുകള്‍ പുതുതായി വരും. മലബാറിലെ മറ്റു ജില്ലകള്‍ക്കും പുതിയ ബാച്ചുകള്‍ ഉണ്ട്. പാലക്കാട്- 4, വയനാട്- 4 കണ്ണൂര്‍ 10, കാസര്‍ഗോഡ്‌ 14 എന്നിങ്ങനെയാണ് അനുവദിച്ചിരിക്കുന്നത് എന്ന് പൊതുവിദ്യാഭ്യാസ വകുപ്പ് മന്ത്രി വി ശിവന്‍കുട്ടി അറിയിച്ചു. അധികമായി അനുവദിച്ച ബാച്ചുകളില്‍ 17 എണ്ണം സയന്‍സും, 28 എണ്ണം കോമേഴ്സും, 52 എണ്ണം ഹുമാനിറ്റീസുമാണ്.
മുസിരിസ് പോസ്റ്റിനെ ടെലഗ്രാം, വാട്‌സാപ്പ് എന്നിവയിലൂടേയും ഫോളോ ചെയ്യാം. വീഡിയോ സ്‌റ്റോറികള്‍ക്കായി ഞങ്ങളുടെ യൂട്യൂബ് ചാനല്‍ സബ്‌സ്‌ക്രൈബ് ചെയ്യുക
മലപ്പുറത്ത് പ്ലസ് വണ്‍ സീറ്റുകള്‍ക്കുള്ള ഞെരുക്കം ദേശീയ ശ്രദ്ധയില്‍ വന്നിരുന്നു. ജസ്റ്റിസ് മാര്‍ക്കണ്‍ഡേയ കട്ജൂ ഉള്‍പ്പെടെയുള്ളവര്‍ സംസ്ഥാന സര്‍ക്കാരിനെതിരെ രംഗത്തെത്തിയിരുന്നു. മലപ്പുറം ജില്ലയില്‍ മാത്രം 8338 വിദ്യാര്‍ഥികളാണ് പ്ലസ് വണ്‍ പ്രവേശനത്തിനായി കാത്തുനില്‍ക്കുന്നത്. രണ്ടാം സപ്ലിമെന്‍ററി അലോട്ട്മെന്‍റ് വന്നപ്പോള്‍ മലാബാറിലാകെ 15,784 അപേക്ഷകരാണ് ഉണ്ടായിരുന്നത്. ഇതില്‍ 1,879 മാത്രമേ ഒഴിവുള്ളൂ. ഈ പ്രശ്നം പരിഹരിക്കാനാണ് സര്‍ക്കാരിന്‍റെ പുതിയ നടപടികള്‍. കഴിഞ്ഞ വര്‍ഷവും അധികമായി 81 താല്‍ക്കാലിക ബാച്ചുകള്‍ സര്‍ക്കാര്‍ അനുവദിച്ചിരുന്നു.
